قوباد تاڵه‌بانی: به‌ره‌و كۆتاییهێنان به‌كێشه‌ی مووچه‌ ده‌ڕۆین

PUKMEDIA

قوباد تاڵەبانی

جێگری سه‌رۆكوه‌زیرانی هه‌رێمی كوردستان رایگه‌یاند: "له‌كۆبوونه‌وه‌ی ئه‌نجومه‌نی وه‌زیراندا داوا له‌ وه‌زاره‌ته‌كان كرا له‌مه‌ودوا زووتر لیستی مووچه‌ ئاماده‌ بكه‌ن و به‌بۆچوونی من له‌مانگه‌كانی داهاتوودا كێشه‌ی مووچه‌ له‌هه‌رێم نامێنێت".

قوباد تاڵه‌بانی جێگری سه‌رۆكوه‌زیرانی هه‌رێمی كوردستان له‌میانه‌ی كۆنفرانسێكی رۆژنامه‌وانیدا له‌په‌راوێزی سه‌ردانه‌كه‌ی بۆ قەزای چه‌مچه‌ماڵ له‌باره‌ی مووچه‌ی هێزه‌ ئه‌منییه‌كان و پێشمه‌رگه‌ ئەوەی راگەیاند: "چاوه‌ڕ‌وانی ئه‌نجامی وردبینی لیژنه‌ی چاودێریی دارایی عیراقین و هه‌ركات وردبینییه‌كه‌ ته‌واوكرا مووچه‌ی مانگی ئایاری هێزه‌ ئه‌منییه‌كان خه‌رج ده‌كرێت".

"له‌ مانگه‌كانی داهاتوودا ئه‌و كێشه‌یه‌ نامێنێت و له‌كاتی خۆیدا مووچه‌ی هێزه‌ ئه‌منییه‌كان و پێشمه‌رگه‌ خه‌رج ده‌كرێت"، قوباد تاڵەبانی وای وت.

جێگری سەرۆکوەزیران راشیگەیاند: "له‌دواكۆبوونه‌وه‌ی ئه‌نجومه‌نی وه‌زیراندا داوا له‌ وه‌زیره‌كان كرا كه‌ زووتر لیستی مووچه‌ی وه‌زاره‌ته‌كانیان ئاماده‌ بكه‌ن، تا له‌ رێی وه‌زاره‌تی داراییه‌وه‌ ئاڕاسته‌ی دارایی عیراق بكرێت و به‌ره‌و كۆتایی كێشه‌ی مووچه‌ ده‌ڕۆین".

ئەوەش دەڵێت: "هه‌موو هه‌وڵێكمان بۆ ئه‌وه‌یه‌ كه‌ دواكه‌وتنی مووچه‌ له‌ هه‌رێم نه‌مێنێت و هه‌موو ئه‌و داوایانه‌ی به‌غداش كردویه‌تی جێبه‌جێكراون و هه‌وڵده‌ده‌ین هیچ بۆشاییه‌ك بۆ نه‌ناردنی مووچه‌ له‌ به‌غداوه‌ نه‌هێڵین".

PUKMEDIA