هاوپەیمانی بەڕێوەبردنی دەوڵەت: حکومەتی خۆجێی کەرکوک و دیالە پێکبهنرێت

PUKMEDIA

کۆبوونەوەی هاوپەیمانی بەڕێوەبردنی دەوڵەت

بە ئامادەبوونی بافڵ جەلال تاڵەبانی سەرۆکی یەکێتیی نیشتمانیی کوردستان، ھاوپەیمانی بەڕێوەبردنی دەوڵەت لە بەغدا کۆبووەوە و جەختیکردەوە، لە گرنگی پێکھێنانی حکومەتە خۆجێیەکانی کەرکوک و دیالە.

بەگوێرەی راگەیەندراوێکی رۆژنامەوانی کۆبوونەوەکە  لە ماڵی محەمەد شیاع سودانی سەرۆک وەزیرانی عیراق بووە و وێنەیەکی دەست PUKMEDIA کەوتووە، تێیدا تاوتوێی دوا پێشھاتە گرنگەکانی عێراق و ناوچەکە بە گشتی کراوە، بەپێی راگەیەندراوەکەش جەختکراوەتەوە لە ھەوڵەکانی حکومەت و دامودەزگا پەیوەندیدارەکان بۆ خزمەتکردنی زیاتری ھاووڵاتیان.

تەوەرێکی دیکەی کۆبوونەوەکە تەئکیدکردنەوەبووە لە گرنگی پێکھێنانی ھەردوو حکومەتی خۆجێی کەرکوک و دیالە و یەکلاییکردنەوەی پۆستی سەرۆکی ئەنجومەنی نوێنەران بە زووترین کات، ھەروەھا ھاوپەیمانی بەڕێوەبردنی دەوڵەت ھەوڵەکانی حکومەتی عیراقی بەرزنرخاند لەبارەی پرسی کشانەوەی ھێزەکانی ئەمریکا و ئاماژەی بەوەشدا، تۆمەتبارکردنی دەسەڵاتی دادوەری عیراق بەھیچ شێوەیەک قبوڵکراو نییە.

دواتر راپۆڕتی لیژنەی تایبەتمەند بە چاودێریکردنی کارنامەی حکومەت خرایەڕوو و تیایدا ئاماژە بەوەکرا، تائێستا ٪٦٨ـی کارنامەی حکومەتی فیدراڵ جێبەجێکراوە.
PUKMEDIA