سەرۆککۆمار لێدوانەکانی دژبە دامەزراوەی دادوەری عیراق سەرکۆنەدەکات

PUKMEDIA

سەرۆککۆمار

سەرۆککۆماری عیراق لێدوانەکانی مایك واڵتز ئەندامی کۆمارییەکان لەکۆنگرێسی ئەمریکا لەسەر دادوەر فایەق زێدان سەرۆکی ئەنجومەنی باڵای دادوەری عێراق سەرکۆنە دەکات و رایدەگەیەنێت: "سیستمی دادوەریی عێراق، یەکێکە لە رەسەنترین سیستمە سەربەخۆکانی دادوەری لە ناوچەکەدا".

لەبەیاننامەیەکدا کە کۆپییەکی بۆ PUKMEDIA نێردراوە د. لەتیف رەشید سەرۆککۆماری عیراق ئیدانەی لێدوانەکانی مایك واڵتز ئەندامی کۆمارییەکان لەکۆنگرێسی ئەمریکا لەسەر دادوەر فایەق زێدان سەرۆکی ئەنجومەنی باڵای دادوەری عێراق دەکات و رایدەگەیەنێت: "سەرکۆنەی لێدوانەکانی مایك واڵتز ئەندامی کۆمارییەکان لەکۆنگرێسی ئەمریکا دەکەین، کە نەك تەنها دادوەر فایەق زێدان سەرۆکی ئەنجومەنی باڵای دادوەری عێراق دەگرێتەوە، بەڵکو سەربەخۆیی دەسەڵاتی دادوەری عێراقیش پێشێل دەکات، کە پایەیەکی سەرەکییە لە پایەکانی دەوڵەت".

"لێرەدا دەمانەوێت دوپاتی بکەینەوە، کە سیستمی دادوەریی عێراق، یەکێکە لە رەسەنترین سیستمە سەربەخۆکانی دادوەری لە ناوچەکەدا، کە بەدیهێنانی دادپەروەری مسۆگەردەکات و پشتگیری لە سەروەریی یاسا و مافە رەواکانی هاووڵاتیان دەکات تا بە شکۆمەندی  و ئازادی بژین، هەروەها ئەو سەقامگیریی ئاسایش و سیاسییەی عێراق بەڵگەیەکی روون و ئاشکرای ئەم راستییە دەگەیەنێت"،  سەرۆککۆمار وادەڵێت.

لە راگەیەندراوەکەشدا هاتووە: "دوبارەکردنەوەی ئەو جۆرە لێدوانە نابەرپرسیارانە، رەنگە کاریگەری لەسەر سروشتی پەیوەندییە دووقۆڵییەکانی نێوان عێراق و ویلایەتە یەکگرتووەکانی ئەمریکا دروستبکات".

PUKMEDIA