ئەمریکا هێرشەکانی سەر هەرێمی کوردستان ئیدانە دەکات

PUKMEDIA

هێرش بۆ سەر هەرێمی کوردستان

ئەمریکا هێرشی گروپە چەکدارەکان بۆ سەر نووسینگە دیپلۆماسییەکان و کونسوڵگەرییەکان لە هەرێمی کوردستان ئیدانە دەکات و داواش لە حکومەتی عیراق دەکات هەموو ڕێوشوێنە گونجاوەکان بۆ پاراستنی دیپلۆماتکار و دامەزراوەکانی ئەمریکا بگرێتەبەر.

تۆمی بیگۆت جێگری وتەبێژی وەزارەتی دەرەوەی ئەمریکا، لە ڕاگەیەنراوێکدا ئاماژەى بەوە کرد: مارکۆ ڕوبیۆ وەزیری دەرەوەی ئەمریکا پەیوەندییەکی تەلەفۆنی لەگەڵ محەمەد شیاع سوودانی سەرۆکی وەزیرانی عیراق ئەنجامداوە.
راشیگەیاند: وەزیری دەرەوە  لەو پەیوەندییە تەلەفۆنییەدا بە توندی هێرشە تیرۆریستییەکانی ئیدانە کردووە، کە لەلایەن گروپە چەکدارەکانەوە دژی هەرێمی کوردستان ئەنجام دراون.

جێگری وتەبێژی وەزارەتی دەرەوەی ئەمریکا، لە راگەیەندراوەکەیدا، ئەوەشی روونکردووەتەوە: کە هەردوو لا دووبارە جەختیان لەسەر ئەوە کردووەتەوە، کە گرنگە حکومەتی عیراق هەموو ڕێوشوێنە گونجاوەکان بگرێتەبەر بۆ پاراستنی دیپلۆماتکار و دامەزراوەکانی ئەمریکا.

لە لایەکی دیکەوە، نووسینگەی راگەیاندنی سەرۆکی وەزیرانی عیراق، لە ڕاگەیەنراوێکدا ئاماژەی بەوەکرد: سەرۆکی وەزیرانی عیراق لەو پەیوەندییە تەلەفۆنییەدا دووبارە پابەندبوونی عیراقی بۆ پاراستنی نووسینگە و باڵیۆزخانە و کونسوڵخانەکان دووپات کردووەتەوە.

هاوکات، داواشی کردووە ئاسمان و خاک و ئاوی عیراق، بۆ هیچ کردەوەیەکی سەربازی دژی وڵاتانی دراوسێ یان ناوچەکە بەکارنەهێنرێن.

PUKMEDIA