بێ کارەبایی ئامێرەکانی راکێشانی پارە دەکوژێنێتەوە

میدیاکان

ئامێرێکی ATM

هەندێک لە کەناڵەکانی راگەیاندن دەنگۆی ئەوەیان بڵاوکردووەتەوە، ئەو مووچەخۆرانەی لەڕێگەی (هەژماری من)ەوە مووچە وەردەگرن ئەمشەو دەتوانن مووچە وەربگرن، پەیامنێرەکانی PUKMEDIA ش لەپارێزگاکانی هەرێم رایدەگەیەنن: ئەو دەنگۆیانە دوورن لەڕاستییەوە و بەشێکی زۆری (ATM)کانی پارێزگاکانی هەرێمی کوردستان لەبێ کارەبایدا کوژاونەتەوە.

هەرچەندە بەپێی ئەو خشتەیەی وەزارەتی دارایی حکومەتی هەرێمی کوردستان بۆ دابەشکردنی مووچە بڵاویکردەوە، سبەینێ دەست بە دابەشکردنی مووچەی مانگی شوباتی مووچەخۆرانی هەرێم دەکرێت و بڕیارە چەند دەستە و وەزارەتێک مووچە وەربگرن، بەڵام بەهۆی نەبوونی کارەبا و پرۆژەی رووناکیی کە چەند سەعاتێکی کەم کارەبا دەدەن بە هاووڵاتیان ئامێرەکانی ATM لەپاریزگاکانی هەرێم کارناکەن.

هاوکات پەیامنێرەکانی PUKMEDIA لەپارێزگاکانی هەرێم رایانگەیاند: بەشێکی زۆری (ATM)کانی پارێزگاکانی هەرێمی کوردستان لەبێ کارەبایدا کوژاونەتەوە و چاوەڕواندەکرێت سبەینێ قەرەباڵغییەکی زۆر دروستبکەن و نەتوانن مووچەکانیان وەربگرن، بەجۆرێک ATMکانی پارێزگای سلێمانی و هەڵەبجە نە کاردەکەن و نە پارەشیان تێدایە.

ئەمەش لەکاتێکدایە، لەئێستادا 7هەزار و 28 هەزار مووچەخۆر لەڕێگەی (هەژماری من)ەوە مووچە وەردەگرن و وەزارەتی دارایش سبەینێ دەست بەدابەشکردنی مووچەی مانگی شوباتی مووچەخۆران دەکات، هاوکات چاوەڕواندەکرێت کارنەکردنی ئامێرەکان کێشەیەکی زۆر بۆ مووچەخۆران دروستبکات.

PUKMEDIA