وەزارەتی دارایی خشتەی مووچەی مانگی دووی فەرمانبەرانی راگەیاند

PUKMEDIA

دراوی عیراقی

دوای ئەوەی وەزارەتی دارایی عيراق تەمویلی مووچەی مانگی دووی مووچەخۆرانی بۆ هەرێم نارد، وەزارەتی دارایی خشتەی مووچەی مانگی دووی فەرمانبەرانی راگەیاندو بەگوێرەی خشتەكە لەماوەی سێ رۆژدا مووچەی سەرجەم وەزارەتەكان دابەشدەكرێت.

وەزارەتی دارایی و ئابوری هەرێم رایگەیاندووە: رۆژی سێ شەممە 10 ی ئازاری 2026 دەستبەدابەشكردنی مووچەی مانگی شوبات دەكرێت و رۆژی پێنج شەممە 12 ی ئازاری 2026 كۆتایی بەدابەشكردنی مووچە دێت.

بەپێی خشتەكەش، سبەی سێشەممە، هەریەك لە وەزارەتەكانی ( خانەنشینی شارستانی و پیشمەرگە، زیندانییە سیاسییەكان، بەركەوتووانی كیمیاباران، كەسوكاری شەهیدان و ئەنفالكراوان، كاروباری شەهیدان و ئەنفالكراوان، پەروەردە، تەندروستی، خوێندنی باڵا و توێژینەوەی زانستی) مووچە وەردەگرن.

رۆژی چوار شەممەش، مافی مرۆڤ، دەستەی دەستپاكی، دەستەی وەبەرهێنان، دەستەی ژینگە، دەزگای مین، ناوچەكانی دەرەوەی هەرێم، كۆمسیۆنی باڵای هەڵبژاردن، دیوانی چاودێری دارایی، خاوەن پێداویستی تایبەت، ئاوەدانكردنەوەو نیشتەجێكردن، دارایی و ئابوری، ناوخۆ، داد، ئەنجومەنی دادوەری، پلاندانان، بازرگانی و پیشەسازی، سامانە سروشتییەكان، گواستنەوەو گەیاندن، كشتوكاڵ و سەرچاوەكانی ئاو، شارەوانی و گەشتوگوزار، كارو كاروباری كاروباری كۆمەڵایەتی، رۆشنبیری و لاوان، كارەبا، ئەوقاف و كاروباری ئاینی، هێزی زێرەڤانی و فەرماندەی بەرگری فریاكەوتن، سەرۆكایەتی پەرلەمان، سەرۆكایەتی ئەنجومەنی وەزیران، سەرۆكایەتی هەرێم مووچە وەردەگرن.

هاوكات رۆژی پێنجشەممە كۆتایی بەدابەشكردنی مووچە دێت و یەكەی 70 و 80، پێشمەرگە (دیوان،لیواكان) ب. پۆلیسی دام و دەزگا نەوتییەكان و ئەنجومەنی ئاسایش و دەزگای ئاسایش مووچە وەردەگرن.

ئەمەش لەكاتێكدایە، ئەمڕۆ دوو شەممە، دواین گوژمەی تەمویلی مووچەی مانگی شوبات خرایە سەر هەژماری بانكی وەزارەتی دارایی و وەزارەتەكەش رایگەیاند: بڕی ( 295 ) ملیارو ( 405 ) ملیۆن دینار وەك دواین گوژمەی تەمویلی مووچەی مانگی شوباتی فەرمانبەران و مووچەخۆرانی هەرێمی كوردستان خرایە سەر هەژماری بانكی وەزارەتی دارایی و ئابووری لەلقی هەولێری بانكی ناوەندی عیراق.

PUKMEDIA

خشتەی مووچەی مانگی دووی فەرمانبەران: