یادی 35 ساڵەی راپەڕین... چەندین ناوچەی دیکە ئازاد کران

ئەرشیف

راپەڕینی ساڵی 1991

لە چوارچێوەی راپەڕینە جەماوەرییەكەی گەلی كورد دا و رۆژی 10ی3ی1991، خەڵكی بەشێكی زۆر لەناوچەكانی دیكەی هەرێمی كوردستان لەدژی زوڵم و زۆری رژێمی بەعس راپەڕین و چەندین شوێنی دیكە بەڕابەرایەتی پێشمەرگەكانی یەكێتیی نیشتمانیی كوردستان ئازادكران. 

لەرۆژێكی وەك ئەمڕۆدا و 35 ساڵ لەمەوبەر بڵێسەی راپەڕین چەند ناوچەیەكی باشوری كوردستانی گرتەوەو كۆمەڵانی خەڵك شانبەشانی پێشمەرگە لەدژی رژێمی بەعس راپەڕین.

ئەمڕۆ 10ی ئادار، 35 ساڵ بەسەر راپەڕینی ناوچەكانی (رەواندز و سۆران و ھەریر و خەلیفان و باسرمە و سیدەكان و مێرگەسۆر و تەقتەق و پیرمام و سەڵاحەدین و خانەقین و دیانا و كفری) تێپەڕ دەبێت، كە ھاوشانی پێشمەرگە لە دژی رژێمی دیكتاتۆری بەعس راپەڕین و ئەو ناوچانە لە رژێم پاككرانەوە.

یەكێتیی نیشتمانیی كوردستان ئەندازیار و پلاندانەری راپەڕین بوو، چونكە پێش راپەڕین لەسەر داوای یەكێتی بەرەی كوردستانی پێكهێنراو راپەڕین دەستیپێكرد، لەرێی رێكخستنەكانی ناوشاریشەوە ئامادەكاری تەواوی كرد بۆ راپەڕین لە سەعاتی سفرداو ئێزگەی دەنگی گەلی كوردستانیش سەرچاوەی گەیاندنی كۆدەكانی راپەڕین بوو، بۆیە شانەچەكدارەكان بە كردنەوەی كۆدەكانیان هەڵمەتەكانیان دەستپێكرد.

PUKMEDIA