قوباد تاڵەبانی لەگەڵ بریکاری وەزارەتی دەرەوەی ئەڵمانیا کۆبووەوە

نوسینگەى راگەیاندنى قوباد تاڵەبانى

قوباد تاڵەبانی جێگری سەرۆکوەزیران و جیزا ئەندریاس ڤۆن گەیر بریکاری وەزارەتی دەرەوەی ئەڵمانیا

قوباد تاڵەبانی، جێگری سەرۆکوەزیران پێشوازیکرد لە جیزا ئەندریاس ڤۆن گەیر بریکاری وەزارەتی دەرەوەی ئەڵمانیا و پێکەوە گفتوگۆیان کرد لەبارەی دواین پێشهات و گۆڕانکارییەکانی ناوچەکە.

لە کۆبوونەوەکەدا کە رۆژی چوارشەممە(25/2/2026) لە هەولێر بە ئامادەبوونی  دانیال کرێبەر، باڵیۆزی ئەڵمانیا بەڕێوەچوو، ئاڵوگۆڕی بیروڕا کرا، لەبارەی دۆخی ناوچەکە.

لەم بارەیەوە وەزیری دەوڵەت بۆ کاروباری دەرەوەی ئەڵمانیا ئاماژەی بەوەدا، ناوچەکە لەبەردەم هەندێک پێشهات و گۆڕانکاری نوێدایە و رایگەیاند: حکومەتی ئەڵمانیا لەگەڵ پاراستنی ئاشتی و سەقامگیری ناوچەکەدایە.

سەبارەت بە دۆخی عیراق، هەردوولا هاوڕابوون کە پێویستە هەنگاوەکانی پێکهێنانی حکومەتی نوێی عیراق خێراتر بکرێت.

جەختیشیان کردەوە دەبێت حکومەتی نوێی عیراق لەم دۆخەدا بەرژەوەندی عیراق بخاتە سەرووی هەموو شتێکەوە و سەروەری و سەربەخۆیی خۆی بپارێزێت و وڵات لە هەر چەشنە ئاڵۆزی و ناسەقامگیرییەک بەدوور بگرێت.

لەبارەی هەرێمی کوردستانیشەوە، بە گرنگییەوە باس لە پێویستی یەکدەنگیی کورد لەم قۆناغەدا کرا بۆ ئەوەی هەرێمی کوردستان بتوانێت رۆڵێکی گرنگ ببینێت لە عیراقدا و هاوکاربێت لە پاراستنی ئاسایش و سەقامگیری ناوچەکەدا.

هەر لەم چوارچێوەیەدا باس لە مەترسیی بووژانەوەی رێکخراوی تیرۆریستیی داعش کرا کە هەڕەشەیەکی جدییە بۆسەر ئاسایشی هەرێم و ناوچەکە و بە پێویست زانرا ئاستی هەماهەنگی و هاوکارییە ئەمنییەکان زیاتر بکرێت.

لە بەشێکی دیکەی کۆبوونەوەکەدا باس لە گرنگیی مانەوەی هێزەکانی ئەڵمانیا لە کوردستان و عیراق کرا. قوباد تاڵەبانی سوپاسی هاوکارییەکانی حکومەتی ئەڵمانیای کرد و بە تایبەت هاوکارییەکانی ئەو وڵاتەی لە بواری راهێنان و یەکخستنەوەی هێزەکانی پێشمەرگەی بەرز نرخاند.

PUKMEDIA