مه‌ڵبه‌ندی خانه‌قین: یاریكردن به‌سنووری خانه‌قین، یاریكردنه‌ به‌سه‌قامگیری ناوچه‌كه‌

PUKMEDIA

خانەقین

مه‌ڵبه‌ندی خانه‌قینی یه‌كێتیی نیشتمانیی كوردستان له‌ راگه‌یه‌ندراوێكدا ئاماژه‌ بۆ ئه‌وه‌ده‌كات، به‌توندی ڕ‌ووبه‌ڕ‌ووی هه‌ر هه‌وڵێك ده‌بینه‌وه‌ كه‌ بیه‌وێت ناسنامه‌ی مێژوویی و یه‌كه‌ كارگێڕ‌ییه‌كانی خانه‌قین بشێوێنێت، چونكه‌ خانه‌قین بۆ یه‌كێتی هێڵی سووره‌؛ ڕ‌ێگه‌ ناده‌ین به‌ناوی چاكسازی ئیدارییه‌وه‌، پیلانی دابڕ‌ین و لاوازكردنی پێگه‌ی كورد له‌ناوچه‌ دابڕ‌ێنراوه‌كان جێبه‌جێ بكرێت.

ده‌قی راگه‌یه‌ندراوه‌كه‌....

به‌یاننامه‌ی مه‌ڵبه‌ندی ڕ‌ێكخستنی خانه‌قینی (ی.ن.ك)
كۆمه‌ڵانی خه‌ڵكی خۆڕ‌اگری خانه‌قین.

ئێمه‌ له‌ مه‌ڵبه‌ندی خانه‌قینی یه‌كێتیی نیشتمانیی كوردستان، به‌ توندی ڕ‌ووبه‌ڕ‌ووی هه‌ر هه‌وڵێك ده‌بینه‌وه‌ كه‌ بیه‌وێت ناسنامه‌ی مێژوویی و یه‌كه‌ كارگێڕ‌ییه‌كانی خانه‌قین بشێوێنێت. بڕ‌یاری جیاكردنه‌وه‌ی ناحیه‌كانی (قه‌ره‌ته‌په‌ و جه‌له‌ولا) له‌ قه‌زای خانه‌قین، بڕ‌یارێكی سیاسیی ناده‌ستوورییه‌ و ته‌واو پێچه‌وانه‌ی مادده‌ی ١٤٠ و بنه‌ماكانی پێكه‌وه‌ژیانه‌.

خانه‌قین بۆ یه‌كێتی هێڵی سووره‌؛ ڕ‌ێگه‌ ناده‌ین به‌ ناوی چاكسازی ئیدارییه‌وه‌، پیلانی دابڕ‌ین و لاوازكردنی پێگه‌ی كورد له‌ ناوچه‌ دابڕ‌ێنراوه‌كان جێبه‌جێ بكرێت. ئێمه‌ له‌گه‌ڵ ده‌نگی ڕ‌ه‌وای خه‌ڵكه‌كه‌مانین و پشتگیری ته‌واوی گه‌نجان و چالاكوانانی سنوره‌كه‌ و هه‌ر هه‌ڵوێستێكی مه‌ده‌نی و ناڕ‌ه‌زایه‌تییه‌كی جه‌ماوه‌ری ده‌كه‌ین بۆ پوچه‌ڵكردنه‌وه‌ی ئه‌م بڕ‌یاره‌ ناده‌ستوری و دوور له‌یاساییانه‌.

داوا ده‌كه‌ین ده‌ستبه‌جێ ئه‌م هه‌نگاوه‌ ڕ‌ابگیرێت، چونكه‌ یاری كردن به‌ سنووری ئیداری خانه‌قین، یاری كردنه‌ به‌ سه‌قامگیری ناوچه‌كه‌.

مه‌ڵبه‌ندی خانه‌قین یه‌كێتیی نیشتمانیی كوردستان
 ٢٤ی شوباتی ٢٠٢٦

PUKMEDIA