دامەزراوەی ڤیژن دەرئەنجامی توێژینەوەیەك لەبارەی چەواشەكاری ماوەی بانگەشە بڵاودەكاتەوە

PUKMEDIA

دامەزراوەی ڤیژن دەرئەنجامی توێژینەوەیەك لەبارەی چەواشەكاری ماوەی بانگەشە بڵاودەكاتەوە

دامەزراوەی ڤیژن، دەرئەنجامی توێژینەوەیەكی لەبارەی چەواشە لەماوەی بانگەشەی هەڵبژاردندا بڵاوكردەوە و بەپێی دەرئەنجامەكان، 10% ی ئەو هەواڵە ناڕاستانەی كە بڵاوكراونەتەوە سوكایەتی و هێرش بوون بۆ سەر ژنان و ئەوەشی دەمێنێتەوە ڤیدیۆ و وێنەی كۆن و ساختە و ژیری دەستكرد بوون.

دامەزراوەی ڤیژن بۆ لێكۆڵینەوەی ستراتیژی، دەرئەنجامی توێژینەوەیەكی بە ناونیشانی زانیاری ناڕاست و چەواشە لەماوەی بانگەشەی هەڵبژاردندا لەهەرێمی كوردستان بڵاوكردەوە، بۆ توێژینەوەكەشی پشتی بە هەواڵ و بڵاوكراوەی كەناڵ و سۆشیاڵ میدیا رەسمییەكان بەستووە، كە لە كۆی 200 هەواڵ و بڵاوكراوە 49 هەواڵیان ناڕاست بوون، لەو رێژەیەش 10% ی هەواڵەكان سوكایەتی و هێرش بوون بۆ سەر ژنان و 49% ی هەواڵی ناڕاستی تێكست بوون، 10% ی هەواڵەكان وێنەكانیان ساختە و كۆن بوون، 4% ی بابەتەكان بۆ چەواشە بە ژیری دەستكرد كراون و 16% ی هەواڵەكانیش ڤیدیۆی ساختە بوون.

دامەزراوەكە رایگەیاند: پڕۆژەكە بۆ گەڕان و دۆزینەوەی هەواڵی ناڕاست و چەواشە بووە لەكاتی بانگەشەی هەڵبژاردن و راستكردنەوەی زانیاری هەڵە و گەیاندنی زانیاری راست و دروستە بە وەرگر.

راشیگەیاند: ئامانج لە پڕۆژەكە، بەگژداچوونەوەی ئەو زانیاریانەیە كە كاریگەری دەكەنە سەر متمانەی دەنگدەر لەپڕۆسەی دەنگدان و بڵاوكردنەوەی هۆشیاری هەڵبژاردنە بە دەنگدەر بەئومێدی بەڕێوەچوونی هەڵبژاردنی بێخەوش و دوور لە چەواشەكاری.

ئەوەشی خستەڕوو: گرنگی پڕۆسەكە لەوەدایە كە پارێزگاری لە دژی چەواشەكردنی دەنگدەر و پشتیوانی لە پڕۆسەی شەفافیەت دەكات، هاوكات كار لەسەر بەهێزكردنی متمانەی دەنگدەر بە پڕۆسەی هەڵبژاردن دەكات.

PUKMEDIA