قوباد تاڵەبانی: هێرشكردنەسەر كۆرمۆر تاوانێكی تیرۆریستییە

PUKMEDIA

قوباد تاڵەبانی، جێگری سەرۆكوەزیرانی هەرێم

قوباد تاڵەبانی، جێگری سەرۆكوەزیرانی هەرێم، پەیامێكی لەبارەی هێرشكردنەسەر كێڵگەی گازی كۆرمۆر بڵاوكردەوە و رایگەیاند: هێرشكردنەسەر كۆرمۆر، تاوانێكی تیرۆریستییە و چەند بارەبوونەوەی بۆ ژێرخانی ئابووریی كوردستان پەرەسەندنێكی مەترسیدارە و پێویستی بە هەنگاویی كردەییە، راشیدەگەیەنێت: ئەركی حكومەتی فیدراڵە بكەرانی ئەم هێرشە رووبەڕووی سزا بكاتەوە، چونكە بەردەوامی ئەم هێرشانە چیتر قبوڵكراونییە و دەبێت هەنگاوی سەرەكیی حكومەتی داهاتووی عیراق كۆتاییهێنان بێت بەم دۆخە.

دەقی پەیامەكە:

هێرشكردنەسەر كێڵگەی گازی كۆرمۆر، تاوانێكی تیرۆریستی گەورە و بە ئامانجگرتنی ژیان و گوزەرانی رۆژانەی خەڵك و ژێرخانی ئابووریی كوردستان و هەموو عیراقە، چەند بارەبوونەوەی ئەم جۆرە هێرشانە بۆسەر ژێرخانی ئابووریی كوردستان پەرەسەندنێكی مەترسیدارە و پێویستی بە هەنگاویی كردەییە.

ئەركی حكومەتی فیدراڵە بە خێرایی بكەران و ئەوانەی لە پشت ئەم هێرشەوەن بۆ رای گشتی ئاشكرا بكات و رووبەڕووی سزا و لێپرسینەوەی یاساییان بكاتەوە. هەروەها جەخت دەكەینەوە بەردەوامی ئەم جۆرە هێرشانە لەلایەن گروپ و هێزی دەرەوەی دەوڵەت چیتر قبوڵكراونییە و ناسەقامگیریی سیاسی و ئەمنی لێ دەكەوێتەوە. هەربۆیە هەنگاوی سەرەكیی حكومەتی داهاتووی عێراق دەبێت كۆتاییهێنان بەم دۆخە و سزادان و كۆكردنەوەی گروپ و هێزە چەكدارەكانی دەرەوەی دەوڵەت بێت.

PUKMEDIA