زیادکردنی ئاشكرا بۆ فرۆشتنی موڵکەکانی کۆمپانیای چاڤی دەکرێت

ئاژانسەکان

چاڤی لاند

بەڕێوەبەرایەتی جێبەجێکردنی دووەمی سلێمانی سەربە وەزارەتی دارایی و ئابوری رایگەیاند: "بەشێک لە پشکەکانی کۆمپانیای چاڤی گەشتیاری لە زیادکردنی ئاشكرادا دەفرۆشرێن و ئەمرۆ پرۆسەکە بەڕێوەدەچێت".

وەزارەتی دارایی و ئابوری لە راگەیندراوێکدا کە کۆپیەکی دەست PUKMEDIA کەوتوە رایگەیاندوە: "ئەمڕۆ یەکشەممە 5-10-2025 پڕۆسەی فرۆشتنی زیادکردنی ئاشکرای موڵکەکانی ( کۆمپانیای چاڤی بۆ وەبەرهێنانی گەشتیاری - هاوپشکی تایبەت ) لەبەڕێوەبەرایەتی جێبەجێکردنی دووەمی سلێمانی بەڕێوەدەچێت".

ئاماژە بەوەش کراوە: "ژمارەی موڵکەکان ( 60) موڵکە، بەمەبەستی گەڕانەوەی قەرزەکانی بانکەکانی سەر بەوەزارەتمان کە بڕەکەی 91 ملیار و 7 سەد و 60 ملیۆن و 6 سەد و 60 هەزار و 300 و 50 دینارە و سەرجەم موڵکەکانیش بەیەک پاکێج دەفرۆشرێن".

وەزارەتی دارایی دەشڵێت: "بۆ ئەو مەبەستە وەزارەتمان بەشدار دەبێت لە پڕۆسەی زیادکردنەکە، هەر کەس و لایەنێک دەیەوێت بەشداری لە پڕۆسەی زیادکردنەکەدا بکات، دەتوانێت لە نزیکترین کاتدا سەردانی بەڕێوەبەرایەتی جێبەجێکردنی دووەمی سلێمانی بکات بەمەبەستی دەستخستنی زانیاری و ئەنجامدانی ڕێکارە کارگێڕی و یاساییەکان".

PUKMEDIA