ترەمپ هیواخوازە بکوژی چارلی لە سێدارە بدرێت

AFP

دۆناڵد ترەمپ سەرۆکی ئەمریکا

دۆناڵد ترەمپ سەرۆکی ئەمریکا دەستگیرکردنی بکوژی چارلی کێرکی کەسایەتی نزیک لە خۆی راگەیاند و هیواخوازیشە لە سێدارە بدرێت و لە بارەی پەیوەندییشی لەگەڵ روسیا رایگەیاند:" سەبرم لەگەڵ پۆتین تەواو بووە".

ترەمپ لە چاوپێکەوتنێکدا لەگەڵ کەناڵی فۆکس نیوز ، ئاشکرای کرد پێش چەند دەقیقەیەک لە دەستپێکردنی چاوپێکەوتنەکە هەواڵی دەستگیرکردنی گومانلێکراوی کوشتنی کێرکی پێگەیشتووە، کە لەلایەن نوسینگەی لێکۆڵینەوەی فیدڕاڵیەوە دەستگیر کراوە و کەسێکی نزیکی خۆی بکوژی رادەست کردووە.

سەرۆکی ئەمریکا راشیگەیاند:" چارلی کەسێکی باش بووە و شیاوی ئەوە نەبوو ئەوەی بەرامبەر بکرێت، بۆیە هیوادارم بکوژەکە سزای لەسێدارەدان وەربگرێت".

پەیوەست بە پەیوەندییەکانی نێوان ئەمریکا و روسیا و وەستانی جەنگ لە ئۆکراین، دۆناڵد ترەمپ رایگەیاند: سەبرمان لەگەڵ پۆتین تەواو بووە، بۆیە لە كەرتەكانی نەوت و بانكیدا، سزا بەسەر روسیادا دەسەپێنین.

لە بارەی هەوڵەکانیشی بۆ وەستانی جەنگی نێوان روسیا و ئۆکراین، سەرۆکی ئەمریکا ئاماژەی بەوەکرد: بەهۆی ئەو رق و كینەی لەنێوان پۆتین و زیلینسكیدا هەیە، شەڕی ئۆكراین و روسیا سەختترین شەڕە.

PUKMEDIA