یەكێتی لەسەر ئاستی باڵا هەوڵی چارەسەری كێشەی دانیشتوانی گەڕەكی نەورۆز دەدات

PUKMEDIA

گه‌ڕه‌كی نه‌ورۆز له‌ كه‌ركوك

نوێنەرانی یەكێتیی نیشتمانیی كوردستان لەسەر ئاستی باڵا، لەسەر هێڵن بۆ چارەسەركردنی گرفتی ماڵە كوردەكانی گەڕ‌ەكی نەورۆز لەكەركوك و رایدەگەیەنن: رەفتارەكەی سوپای عیراق نایاساییەو ناهێڵین لەكەركوك غەدر لەكورد بكرێت و هەڵكوتانە سەر كورد قبوڵناكەین، پارێزگاری شارەكەش دەڵێت: ئەوەی روویدا تەنها هەڵوێستی چەند ئەفسەرێكی سوپابوو، بۆیە بەیاسایی ئەو كێشەیە چارەسەر دەكەین.

ئەمڕۆ 22ی 2ی 2026، رێبوار تەها، پارێزگاری كەركوك، بەمەبەستی بەدواداچون و چارەسەركردنی كێشەكان گەیشتە گەڕ‌ەكی نەورۆزی كەركوك و رایگەیاند: ئەم خانوانە چەندین ساڵە كێشەیان هەیەو خانووی دەوڵەتن، ئەوەی روویداوە هەڵوێستی چەند ئەفسەرێكی عیراقە كە ئەم خانوانە بەهی خۆیان دەزانن و پێویستە لەڕێی یاساییەوە چارەسەری ئەو كێشەیە بكرێت، بۆیە لەئێستادا دەبێت خاوەن ماڵەكان بگەڕ‌ێنەوە شوێنی خۆیان و دواتر هەرچی چارەسەری یاسایی هەبێت ئێمە وەك ئیدارەی كەركوك دەیكەین و رێكاری پێویست دەگرینەبەر.

نوێنەرێكی یەكێتی: ناهێڵین لەكەركوك غەدر لەكورد بكرێت

براكۆ شەهید شێركۆ فاتیح شوانی، ئەندامی ئەنجومەنی نوێنەرانی عیراق، لەفراكسیۆنی یەكێتی، بەوێبسایتی رەسمی یەكێتیی نیشتمانیی كوردستان PUKMEDIA  ی راگەیاند: ئیدانەی هەڵكوتانە سەر ژمارەیەك ماڵی كورد لەگەڕ‌ەكی نەورۆزی كەركوك دەكەین، چونكە سوپای عیراق بەبێ ئاگاداركردنەوەو لەشەودا چووەتە سەریان و داوای چۆڵكردنی ماڵەكانی لێكردوون. 

راشیگەیاند: راستە خاوەنی ئەو خانوانە كە ژمارەیان لەنێوان 10 بۆ 25 ماڵدایە، چەند جارێك ئاگادار كراونەتەوە كە زەوییەكانیان بەناوی وەزارەتی بەرگرییەوەییەوە، بەڵام لەدوای پڕ‌ۆسەی ئازادییەوە كڕ‌ین و فرۆشتن بەزەوییەكانەوە كراوەو دەبوو لەچوارچێوەی یاسادا كێشەكە چارەسەر بكرێت.

ئاماژەی بەوەشكرد: لەئێستادا ژمارەیەك لەو هێزانە كشاونەتەوەو لەسەر هێڵین بۆ چارەسەركردنی گرفتەكەو ناهێڵین لەكەركوك غەدر لە كورد بكرێت.

رەفتارەكەی سوپا نایاساییە

رەفتاری سوپای عیراق، بەرامبەر خێزانە كوردەكان بەنایاسایی دەزانرێت و یەكێتیی نیشتمانیی كوردستانیش لەسەر هێڵە بۆ چارەسەركردنی گرفتەكە.

هاوكات دیلان غەفور، ئەندامی ئەنجومەنی نوێنەرانی عیراق، لەفراكسیۆنی یەكێتی، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: بەتووندی ئیدانەی هەڵكوتانەسەر خێزانەكانی گەڕ‌ەكی نەورۆز لەلایەن سوپای عیراقەوە دەكەین و ئەم رەفتارەی سوپا بەرامبەر خێزانە كوردەكان نایاساییەو دژی دەوەستینەوە.

راشیگەیاند: لەگەڵ لێپرسراوانی باڵا لەسەر هێڵین بۆ چارەسەری كێشەكەو داوا لەمحەمەد شیاع سوودانی، سەرۆكوەزیرانی عیراق دەكەین دەستوەردانی بەپەلە بكات بۆ كۆتاییهێنان بە پێشێلكارییەكانی سوپا و ئاساییكردنەوەی دۆخی گەڕ‌ەكەكە.

نوێنەرێكی یەكێتی: هەڵكوتانە سەر كورد قبوڵناكەین

نوێنەرانی یەكێتی لەكەركوك تەئكید لەسەر پاراستنی كوردانی گەڕ‌ەكی نەورۆز دەكەنەوەو رایدەگەینن: ئەوەی روویدا قبوڵكراو نییەو چەند ئەفسەرێك بەمەبەستی دەستدرێژی ئەو كارەیان ئەنجامداوە.

هەر لەوبارەیەوە مازن غەریب، ئەندامی ئەنجومەنی نوێنەرانی عیراق، لەفراكسیۆنی یەكێتی، بەوێبسایتی رەسمی یەكێتیی نیشتمانیی كوردستان PUKMEDIA  ی راگەیاند: ئەوەی بەرامبەر دانیشتوانی گەڕ‌ەكی نەورۆزی كەركوك دەكرێت، قبوڵكراو نییەو چەند ئەفسەرێك بەبێ ئاگاداری فەرماندەی ئۆپەراسیۆنەكان بەمەبەستی دەستدرێژی ئەو كارەیان ئەنجامداوە.

راشیگەیاند: هەڵكوتانە سەر كورد قبوڵناكەین و لەئێستادا بەدواداچوون بۆ گرفتەكە دەكەین و لەسەر ئاستی باڵا چارەسەری دەكەین.

درەنگانی شەوی رابردوو، هێزێكی سوپای عیراق هەڵیانكوتایە سەر چەند ماڵێكی كورد نشینی گەڕ‌ەكی نەورۆزی كەركوك و داوای چۆڵكردنی خانووەكانیان لێدەكەن و دەڵێن زەوی ئەو خانووانە بەناوی وەزارەتی بەرگری عیراقەوەیەو دەبێت چۆڵی بكەن، لەبەرامبەردا پارێزگارو نوێنەرانی یەكێتیی نیشتمانیی كوردستان لەسەر ئاستی باڵا لەسەر هێڵن بۆ چارەسەركردنی گرفتەكە.

PUKMEDIA