پارێزگاری كه‌ركوك: كێشه‌ی گه‌ڕ‌ه‌كی نه‌ورۆز به‌یاسایی چاره‌سه‌ر ده‌كه‌ین

PUKMEDIA

پارێزگار گەیشتە گەڕەکی نەورۆز لە کەرکوک

به‌مه‌به‌ستی به‌دواداچوون بۆ گرژی و ئاڵۆزییه‌كانی گه‌ڕ‌ه‌كی نه‌ورۆز له‌كه‌ركوك پارێزگاری كه‌ركوك چووه‌ ناو گه‌ڕ‌ه‌كه‌كه‌و وتی: هه‌وڵی چاره‌سه‌ركردنی كێشه‌كان ده‌ده‌ین.

كه‌مێك پێش ئێستا د. رێبوار ته‌ها پارێزگاری كه‌ركوك به‌مه‌به‌ستی به‌دواداچون و چاره‌سه‌ركردنی كێشه‌كان گه‌یشته‌ گه‌ڕ‌ه‌كی نه‌ورۆزی كه‌ركوك و بۆ كه‌ناڵه‌كان رایگه‌یاند: ئه‌م خانوانه‌ چه‌ندین ساڵه‌ كێشه‌یان هه‌یه‌ و خانووی ده‌وڵه‌تن، له‌سه‌رده‌می ئیداره‌ی پێشووی كه‌ركوك پێنج له‌خانووه‌كان به‌دانیشتوانیان چۆڵكرابوو، به‌ڵام له‌چه‌ند رۆژی رابردوو دووان له‌خانوه‌كان خه‌ڵكی تێهاتوه‌و له‌كاتی هاتنیان ئه‌و مه‌فره‌زانه‌ی لێره‌بوون ئاگادار نه‌بوون و بووه‌ته‌ هۆی ئه‌و گرژیانه‌ی كه‌ڕوویاندا.

راشیگه‌یاند: ئه‌وه‌ی روویداوه‌ هه‌ڵوێستی چه‌ند ئه‌فسه‌رێكی عیراقه‌ كه‌ ئه‌م خانوانه‌ به‌هی خۆیان ده‌زانن و پێویسته‌ له‌ڕێی یاساییه‌وه‌ چاره‌سه‌ری ئه‌و كێشه‌یه‌ بكرێت.

وتیشی: له‌ئێستادا ده‌بێت خاوه‌ن ماڵه‌كان بگه‌ڕ‌ێنه‌وه‌ شوێنی خۆیان و دواتر هه‌رچی چاره‌سه‌ری یاسایی هه‌بێت ئێمه‌ وه‌ك ئیداره‌ی كه‌ركوك ده‌یكه‌ین و رێكاری پێویست ده‌گرینه‌به‌ر.

PUKMEDIA