قوباد تاڵەبانى: دەبێت ئەولەوییەتی حکومەتی داهاتووی عیراق و هەرێم چارەسەری کێشەکانی نێوانیان بێت

نوسینگەى رۆژنامەوانى قوباد تاڵەبانى

قوباد تاڵەبانی جێگری سەرۆکوەزیران و دانێل کرێبەر باڵیۆزی ئەڵمانیا لە عیراق

قوباد تاڵەبانی، جێگری سەرۆکوەزیران پێشوازیکرد لە دانێل کرێبەر، باڵیۆزی ئەڵمانیا لە عیراق و پێکەوە تاوتوێی دۆخی سیاسیی هەرێمی کوردستان و عیراقیان کرد.

لە کۆبوونەوەکەدا کە رۆژی شەممە(6/12/2025) بەڕێوەچوو، باس لە دۆخی سیاسیی هەرێمی کوردستان و بابەتی پێکهێنانی حکومەتی نوێ کرا، لەمبارەیەوە قوباد تاڵەبانی جەختی کردەوە ئامادەین بۆ پێکهێنانی حکومەت لەسەر بنەمای هاوبەشی راستەقینە کە بەبێ جیاوازی خزمەتی هەموو هاووڵاتییان و هەموو ناوچەکانی کوردستان بکات.

سەبارەت بە پڕۆسەی سیاسیی عیراقیش، جێگری سەرۆکوەزیران ئاماژەی بەوەدا عیراق پێویستی بە حکومەتێکی بەهێز و کارا هەیە، کە بتوانێت لەلایەکەوە سەروەری و سەربەخۆیی عیراق بپارێزێت و لەلایەکی دیکەشەوە هەنگاوی بنەڕەتی بنێت بۆ گەشەپێدانی ئابووریی عیراق.

جێگری سەرۆکوەزیران روونیشی کردەوە: کە دەبێت ئەولەوییەتی هەردوو حکومەتی داهاتووی عیراق و هەرێم چارەسەرکردنی بنەڕەتی کێشەکانی نێوانیان بێت.

PUKMEDIA