ئەمڕۆ ئەنجومەنی نوێنەران کۆدەبێتەوە

راگەیاندنى ئەنجومەنى نوێنەران

ئەنجومەنى نوێنەرانى عیراق

ئەنجومەنی نوێنەرانی عیراق ئەمڕۆ دووشەممە، دانیشتنی ژمارە (12)ی خۆی ئەنجام دەدات و بەپێی کارنامەی راگەیەندراو، بڕیارە چەند ئەندامێکی نوێ وەک جێگرەوە سوێندی دەستووری بخۆن و دەنگیش لەسەر پێکهاتەی کۆتایی لیژنە هەمیشەیییەکانی پەرلەمان بدرێت.

بەپێی ئەو کارنامەیەی ئەنجومەنی نوێنەران بڵاویکردووەتەوە، دانیشتنەکەی ئەمڕۆ سەعات (نۆ)ی ئێوارە دەستپێدەکات و دوو بڕگەی سەرەکی لەخۆدەگرێت.

لە کارنامەکەدا هاتووە : بڕگەی یەکەمی دانیشتنەکە تایبەت دەبێت بە سوێندخواردنی دەستووریی ژمارەیەک لە ئەندامانی جێگرەوەی ئەنجومەنی ناوبراو، ئەم پەرلەمانتارانە شوێنی ئەو ئەندامانە دەگرنەوە کە پێشتر بە هەر هۆکارێک (دەستلەکارکێشانەوە، وەرگرتنی پۆست، گەڕانەوە بۆ پۆستی پێشتری خۆیان، یان کۆچی دوایی) کورسییەکانیان چۆڵ بووە و ئەم هەنگاوە بۆ تەواوکردنی پێکهاتەی یاسایی ئەنجومەنەکە گرنگە.

ئاماژە بە ئەوەش دراوە: لە بڕگەی دووەمدا، پەرلەمان دەنگ لەسەر ناوی ئەندامانی لیژنە هەمیشەیییەکان دەدات.

PUKMEDIA