سەعدی پیرە: موخریجی سیناریۆکەی ئەمجارەیان باش نەبوو

PUKMEDIA

سەعدی ئەحمەد پیرە ئەندامی مەکتەبی سیاسیی یەکێتیی نیشتمانیی کوردستان

ئەندامێکی مەکتەبى سیاسیی یەکێتى لەبارەی تۆمەتبارکردنی نێچیرڤان عیسا کە بە (نێچیرڤان هەرکی) ناسراوە لەلایەن دەزگای ئاسایشی هەرێمی کوردستانەوە رایدەگەیەنێت: تۆمەتبارکردنى نێچیرڤان هەرکی تۆڵەکردنەوەیە و باجى کاندیدبوونی لەسەر لیستی یەکێتی پێدەدەن، ئێمە کلیپی لەو جۆرەمان زۆر بینیوە، لەگەڵ ئەوەی بەزۆر دانپێدانان بە دەستگیرکراوەکان کارێکی باش نییە و خۆڵکردنە چاوی خەڵکە، هەرکییەکانیش دەمێکە ناڕازین.

سەعدی ئەحمەد پیرە ئەندامی مەکتەبی سیاسیی یەکێتیی نیشتمانیی کوردستان رایگەیاند: ئێمە کلیپی لەو جۆرەمان زۆر بینیوە، لەگەڵ ئەوەی بەزۆر دانپێدانان بە دەستگیرکراوەکان کارێکی باش نییە و خۆڵکردنە چاوی خەڵکە، هەرکییەکانیش دەمێکە ناڕازین.

جیهان رێز لەهەرێم دەگرێت

راشیگەیاند: هەرکییەکان کاتێک بیانەوێت لەسەر شتێک بەرگری بکەن هەموویان هەرکین و پەیوەندی بە وەستان لە دژی حزبێک نییە، ئەو برادەرانەش ئەگەر بیانەوێت ترەمپ تێبگەیەنن کە نێچیرڤان هەرکی مەترسییەکی گەورەیە و عیراق تێبگەیەنن کە دژی عیراقە و هەرێم تێبگەیەنن کە چاوی بە سەرکەوتنی هەرێم و کارەبای بەردەوام هەڵنایەت و کێشەی گەورە دروست دەکات، ئەوە کلیپێکی بێ ناوەڕۆک و تەواو بێ مانایە.

سەعدی ئەحمەد پیرە ئاماژەی بەوەشکرد، ئەمڕۆ لە هەرێم لەقۆناغێکین جیهان رێزمان لێدەگرێت و زیندووکردنەوەی ئەم جۆرە کلتورە بەناوی دانپێدانان کارێکی باش نییە، بۆیە نابێت یەکێتی قبوڵی بکات، هاوکات هەرکییەکان خەڵکی باشن و خاوەنی بیروباوەڕی عەشایەریی خۆیانن بۆ بەکاریاندەهێنن؟ بهێڵن وەک خۆیان بژین و بیروباوەڕی خۆیان جێبەجێبکەن، هاوکات نێچیرڤان کەسێکی گرنگە لەناو هەرکییەکان و ئەوەی بەرامبەری کراوە شەڕە دژی هەرکییەکان و بە ئاسانیش تێناپەڕێت.

موخریجەکەی باش نەبووە

راشیگەیاند: بەهۆی کێشەکانی نێوانمانەو پارتی رروداوەکان پەیوەست دەکات بە یەکێتییەوە و ئەوەشی عەقڵی نەیبڕێت چەندین تۆمەتی بۆ دروستدەکات، هەرچەندە پاشەڕۆژی هەرێمی کوردستان نابەسترێتەوە بە رووداوێکی دیاریکراوەوە و ئەو دانپێدانانە بەزۆرەش غەدرێکی گەورەیە و ئەمە یەکەم جار نییە فلمی لەو جۆرە دروستدەکەن و ئەو جۆرە فلمانە لەناویاندا هەر هەیە، بەڵام ئەمەی ئەمجارە موخریجەکەی باش نەبوو .

تۆڵەی کاندیدبوونی لەسەر لیستی یەکێتی لێدەکرێتەوە

ئەو ئەندامەی مەکتەبی سیاسی یەکێتی وتیشی: تۆمەتبارکردنى نێچیرڤان هەرکى، وەک ئەنجامدەرى سەرەکیى گرژییەکان، تۆڵەکردنەوەیە لە خۆکاندیدکردنى لە کەڵەک، لەسەر لیستى یەکێتى نەک لەسەر لیستى پارتى و لەناویاندا عەقڵییەتێک دروستبووە، هەرکەسێک جنێو بە یەکێتى بدات ئەستێرەى گەش دەبێت، ئێستا گرووپێک هەیە نانى ئەوە دەخۆن، بەڵام زۆر درێژە ناکێشێت و لە قوڕگیان گیردەبێت و بە پێویستی دەزانێت، لە هەڵمەتى هەڵبژاردن بێنە دەرەوە و ئەو جۆرە دەنگە نەشازانە لە سەرەکییەوە بکوژێنرێنەوە

کاتی پێکهێنانی حکومەتە و نەرمی هەیە

سەعدی ئەحمەد پیرە لەبارەى کۆبوونەوەى یەکێتى و پارتى بۆ پێکهێنانى حکومەتى هەرێمى کوردستان، رایگەیاند: کاتى گفتوگۆ و پێکهێنانى حکومەتە و جۆرێک لە نەرمى هەیە، نابێت بۆ تێکدانى ئەو بابەتە، سیناریۆی جۆراوجۆر بدۆزرێتەوە.

PUKMEDIA