سلێمانی به‌ره‌و پایته‌ختی گه‌شتیاریی هەنگاو دەنێت

PUKMEDIA

سلێمانی

سلێمانی یه‌كێكه‌ له‌و شاره‌ گه‌شتیارییانه‌ی له‌سه‌ر ئاستی هه‌رێمی كوردستان و عیراق جێی سه‌رنجی گه‌شتیارانه‌ و ساڵانه‌ ژماره‌یه‌كی زۆر گه‌شتیار بۆ پشوودان و به‌سه‌ربردنی كاته‌كانیان سلێمانی هه‌ڵده‌بژێرن.

له‌ ساڵی 2007دا، به‌پێی ئامارێك 77 هه‌زار و 933 گه‌شتیار سه‌ردانی سلێمانییان كردووه‌، به‌ڵام ئه‌م ژماره‌یه‌ له‌ ساڵی 2024دا زیادیكردووه‌ بۆ دوو ملیۆن و 95 هه‌زار و 966 گه‌شتیار، واته‌ جیاوازییه‌كی زۆر له‌ هاتنی ژماره‌ی گه‌شتیار له‌و ماوه‌یه‌دا به‌رچاو ده‌كه‌وێت.

له‌گه‌ڵ زیادبوونی ژماره‌ی گه‌شتیاراندا، كه‌ نیشانه‌ی ده‌ركه‌وتنی بایه‌خی زیاتری ناوچه‌كه‌یه‌، ژماره‌ی كۆمپانیا و نووسینگه‌كانی گه‌شتیاری و گه‌شته‌ ئاسمانییه‌كانیش زیادیانكردووه‌، به‌ جۆرێك ته‌نیا له‌ ساڵی 2024دا ژماره‌ی كۆمپانیا و نووسینگه‌ و بریكاره‌ گه‌شتیارییه‌كان گه‌یشتووه‌ته‌ 233، هه‌ر له‌و ساڵه‌دا له‌ فڕۆكه‌خانه‌ی نێوده‌وڵه‌تیی سلێمانی 305 هه‌زار و 516 گه‌شتیاریی هاتوو و رۆیشتوو تۆماركراون كه‌ گه‌شتیان ئه‌نجامداوه‌.

ئاماره‌كان به‌ڵگه‌ی ئه‌و راستییه‌ن و ده‌ریده‌خه‌ن كه‌ له‌ ساڵی 2009دا ته‌نیا 106 شوێنی حه‌وانه‌وه‌ له‌شاره‌كه‌ هه‌بووه‌، به‌ڵام له‌ ساڵی 2024دا زیادیكردووه‌ بۆ 270 شوێنی حه‌وانه‌وه‌، واته‌ زیادبوونه‌كه‌ زیاتره‌ له‌ %100، به‌هه‌مانشێوه‌، ژماره‌ی چێشتخانه‌ و ریستۆرانت و كافێ زیادیكردووه‌ بۆ 661 شوێن.

مۆزه‌خانه‌ی سلێمانیش، دووه‌م مۆزه‌خانه‌یه‌ له‌سه‌ر ئاستی عیراق و له‌ ساڵی 2012دا راسته‌وخۆ له‌لایه‌ن یونسكۆوه‌ نۆژه‌نكرایه‌وه‌، ئه‌م مۆزه‌خانه‌یه‌ له‌ ساڵی رابردوودا هه‌شت هه‌زار و 345 گه‌شتیاری ناوخۆ و بیانی سه‌ردانی كردووه‌.

PUKMEDIA