مەکتەبی سکرتاریەت: کۆیە و کۆییەکان پایەیەک بوون لە پایەکانی خەبات و کوردایەتی

راگەیاندنى مەکتەبی سکرتارییەتی سەرۆک مام جەلال

وێنەى یەکێک لە دیدارەکان

لە شاری کۆیە، مەکتەبی سکرتارییەتی سەرۆک مام جەلال، هەریەک لە هەڤاڵان (رەمەزان ئەحمەد قادر، جەنگی ئەحمەد عوسمان و فەرهاد ئیبراهیم حەمەد) پێشمەرگە و تێکۆشەرانی رۆژانی سەختی خەباتیان بەسەرکردەوە و لە نزیکەوە لە تەندروستییان پرسین و هیوای لەشساغی و تەمەندرێژییان بۆ خواستن.

مەکتەبی سکرتارییەت لەو سەردانانەدا، رۆڵی رابردوو و ئێستای هەڤاڵان (رەمەزان ئەحمەد، جەنگی ئەحمەد و فەرهاد ئیبراهیم)یان بەرز نرخاند، کە کاریگەریی گەورەیان لەسەر شۆڕش و خەباتی چەکداریی هەبووە و توانیویانە لەهەرکوێ بووبن دڵسۆزانە و بە ئەمەکەوە ئەرکەکانیان بەجێ بگەیەنن و جێی متمانەی یەکێتیی نیشتمانیی کوردستان بوون، بۆیە وەفای یەکێتییان بۆ دووپاتکردنەوە و رایانگەیاند : کە کۆیە و کۆییەکان هەر لەسەرەتای هەڵگیرسانی شۆڕشی نوێوە پایەیەک بوون لە پایەکانی خەبات و کوردایەتی دژی رژێمی بەعسی رووخاو و بەشێکی دانەبڕاویش بوون لە یەکێتیی نیشتمانیی کوردستان .

لای خۆیانەوە هەڤاڵانی تێکۆشەر رەمەزان ئەحمەد، جەنگی ئەحمەد و فەرهاد ئیبراهیم لە پاش سوپاسکردنی سەردانەکە، دووپاتیانکردەوە، وەک چۆن لە رابردوودا لە ریزەکانی یەکێتیی دا بەشێک بوون لە خەبات و کوردایەتی، ئێستاش بە هەمان گڕوتین و بە ورەی بەرزەوە کاردەکەن، بۆ سەرخستنی لیستی ٢٢٢ یەکێتیی نیشتیمانیی کوردستان .

PUKMEDIA