بەهۆی جەنگەوە 11 هەزار گەشتی ئاسمانی هەڵوەشاونەتەوە

إيلاف

فڕۆکەخانەی دوبەی

لەگەڵ دەستپێکردنی جەنگی ئیسرائیل و ئەمریکا بۆ سەر ئێران و وەڵامی ئێران بۆ هێرشەکان، زۆربەی کۆمپانیا گەورەکانی جیهان گەشتە ئاسمانییەکانیان بۆ وڵاتانی ناوچەکە هەڵوەشاندەوە و بەپێی بەدواداچونێکیش زیاتر 11 هەزار گەشت هەڵوەشاونەتەوە.

لە سەرەتای جەنگەکەوە، هەریەک لە ئێران و ئیسرائیل ئاسمانی وڵاتەکەیان بەرووی هەموو گەشتێکدا داخست، پاشانیش عیراق تەواوی گەشتەکانی هەڵوەشاندەوە و ئاسمانی وڵاتەکەی داخست.

لەلایەکی دیکەوە، هێڵی ئاسمانی قەتەری گەشتەکانی هەڵوەشاندەوە و رایگەیاند:  بەهۆی داخستنی ئاسمانی قەتەر هەڵوەشاندنەوەی گەشتەکانیان بەردەوام دەبێت.
 هێڵی قەتەری هێشتا کاتی دەستپێکردنەوەی گەشتەکانی دیارینەکردووە و پەیوەستی کردووە بە راگەیاندنی رەسمی دەسەڵاتی فڕۆکەوانی شارستانی وڵاتەکەی و داواش لە گەشتیاران دەکات لە رێگەی ئەپەکانەوە زانیاری وەربگرن.

هاوکات، هێڵی ئاسمانی فەرەنسی" ئێر فرانس"،ڕایگەیاند:هەڵوەشاندنەوەی گەشتەکانی بۆ شارەکانی تەل ئەبيب، بەيروت، دوبەی و ریاز تا 5ی مارسی ئەم مانگە درێژ دەکاتەوە، هۆکاری ئەم بڕیارەشی بۆ بەردەوامبوونی گرژییەکانی ناوچەکە گێڕایەوە.

لەلایەکی دیکەوە، هێڵە ئاسمانییە نیشتیمانییەکانی  ئیمارات کە فرۆکەوانی ئیمارات و فلای دوبەی لەخۆ دەگرێت، بۆ سێیەمین رۆژ گەشتەکانیان هەڵوەشاندووە، بەشێوەیەک  فرۆکەوانی ئیمارات هەڵوەشاندنەوەکەی تا سێشەممە 3ی مارس درێژ کردووە، بەڵام فلای دوبەی خشتەی گەشتەکانی بەپێی گۆڕانکارییەکان رێکدەخات و هێشتا هیچ کاتێکی بۆ دەستپێکردنەوەی گەشتەکان دیاری نەکردووە.

تورکیاش لای خۆیەوە، هەموو گەشتە ئاسمانییەکانی بۆ ئێران، عیراق، ئوردن، سوریا و لوبنان هەتا ڕۆژی هەینی هەڵوەشاندەوە، هەروەها بڕیاری دا، سەرجەم گەشتەکانی رۆژی سێشەممە بۆ قەتەر، کوێت، بەحرەین و ئیمارات هەڵبوەشێنیتەوە.


لە هەمان کاتدا، کۆمپانیای عالی ئیسرائیلی، ڕایگەیاند: هەموو فڕۆکەکانی لە ناو خاکی ئیسرائیل گواستووەتەوە ، لەگەڵ داخستنی تەواوی ئاسمانی ئیسرائیل بەرووی فڕۆکە شارستانییەکان.

بەپێی ڕاپۆرتێکی ڕۆژنامەی وۆل ستريت جورنال، زیاتر لە 11 هەزار گەشتی ئاسمانی بەهۆی ململا‌نێ و جەنگەوە راگیراون،کە کاریگەریی لەسەر نزیکەی 1.5 ملیۆن گەشتیار لە سەرانسەری جیهاندا هەبووە.

PUKMEDIA