د.لەتیف رەشید پێشوازی لە سەرۆککۆماری ئەرمینیا دەکات

نوسینگەی رۆژنامەوانی سەرۆککۆماری عیراق

کۆبوونەوەی سەرۆککۆماری عیراق و سەرۆککۆماری ئەرمەنستان

لە میانی بەشداریکردنی لە کۆبوونەوەکانی کۆمەڵەی گشتی نەتەوە یەکگرتووەکان، د. لەتیف جەمال رەشید سەرۆک کۆماری عیراق، رۆژی دووشەممە 22-9-2025 لە شوێنی حەوانەوەی خۆی لە نیویۆرک پێشوازیکرد لە ڤاهاغان خاچاتووریان سەرۆککۆماری ئەرمەنستان.

هاوکات، لە دیدارێکدا پەیوەندیی دووقۆڵی نێوان هەردوو وڵات و چۆنیەتی پەرەپێدانی هاریکاری لە بوارەکانی ئابووری، رۆشنبیری و خوێندنی باڵا تاوتوێکرا و سەرۆککۆماری عیراق جەختیکردەوە لە گرنگی فراوانکردنی ئاسۆی هاریکاری و هەماهەنگی لە کۆڕبەندییە نێودەوڵەتییەکان.

هەر لە کۆبوونەوەکەدا باس لە کاری کۆبوونەوەکانی کۆمەڵی گشتی و دەرئەنجامەکانی کرا، هەروەها بارودۆخی ئێستای نێودەوڵەتی تاوتوێکرا و هەردوو سەرۆک بیروڕایان ئاڵوگۆڕ کرد سەبارەت بەو ئاستەنگانەی کەڕووبەڕوی کۆمەڵی نێودەوڵەتی دەبێتەوە، لەوانە پەرەسەندنی گرژی نێودەوڵەتی و قەیرانی ئاسایشی خۆراک و وزە، کێشەکانی کۆچ و گۆڕانی کەشوهەوا ، هاوکات جەختیشیانکردەوە لە سەر رێزگرتن لە یاسا نێودەوڵەتییەکان و سەرخستنی پرەنسیپی وتووێژ بۆ چارەسەرکردنی ناکۆکی و پاراستنی ئاشتی و ئاسایشی نێودەوڵەتی.

هەر لەو دیدارەدا هەردوولا پابەندبوونی خۆیان بە پشتیوانیکردن لە هەوڵی فرەلایەن بۆ چارەسەرکردنی ئاستەنگی جیهانیی و پەرەپێدانی هاودەنگی نێودەوڵەتی لە بەرامبەر قەیرانە ئەمنیی و مرۆیی و ئابوورییەکان دووپاتکردەوە.

ئەمەش لەکاتێکدایە، لە دیدارەکەدا  قوباد تاڵەبانی جێگری سەرۆکی حکومەتی هەرێمی کوردستان و د . ساڵح حسناوی وەزیری تەندروستی و. د.کامیل دولەیمی سەرۆکی دیوانی سەرۆکایەتی کۆمار و د. خالید یەعقووبی ڕاوێژکاری سەرۆکی ئەنجومەنی وەزیران  و ژمارەیەک لێپرسراوی باڵای هەردوولا ئامادەبوون.

PUKMEDIA