شارەزایەکی ئابوری: بەرزبوونەوەی بەهای دینار پەیوەندی بە یەدەگی زێڕەوە نیە

PUKMEDIA

زێڕ و دراوی عیراقی

ماوەیەی زیاتر لە مانگێکە بەهای دینار بەرامبەر بە دۆلار لە بازاڕەکانی هەرێمی کوردستان و عیراق رووی لە بەرزبوونەوەیە، شارەزایەکی ئابوریش  رایدەگەیەنێت:" پەیوەندی بە یەدەگی زێڕەوە نیە و هۆکاری دیکەی هەیە".

گوڵاڵە سدیق پسپۆری ئابوری بە PUKMEDIA ی راگەیاند:" لە ماوەی رابردوودا کە نرخی زێڕ بەرزبوونەوەیەکی بەرچاوی بەخۆیەوە بینی، عیراق یەکێک بوو لەو وڵاتانەی کە زێڕێکی زۆری کڕی، لە ئێستادا یەدەگی زێڕی عیراق بەرێژەیەکی زۆر بەرزبووەتەوە".

پەیوەست بە پەیوەندی لە نێوان بەرزبوونەوەی بەهای دینار و یەدەگی زێڕ، ئاماژەی بەوەکرد:"هەبوونی زێڕ بۆ هەر وڵاتێک زۆر پێویستە و پاڵپشتییەکی باشە بۆ بەهێزی ئابوری وڵات، بەڵام ئەمە واتای ئەوە نیە کە بەهای دینار بەرامبەر بە دۆلار بەرزدەکاتەوە، لە راستیدا بەرزبوونەوەی بەهای دینار پەیوەندی بە لایەنی ئابورییەوە نیە، چونکە کاتێک بەهای دراوی ئەو وڵاتە بەرزدەبێتەوە، کە ئابورییەکەی گەشەی زۆری کردبێت، بەڵام وەک دەزانین لە عیراق و هەرێمی کوردستان کە حکومەت پشتی پێدەبەستێت نەوتە، بۆیە ئەگەر سبەی جەنگێک رووبدات یان بازاڕی نەوت ناسەقامگیر بێت، ئەوە عیراق بەرگەری هیچ جەنگێک ناگرێت و دراوەکەشی توشی داتەپین دەبێتەوە".

ئەو  پسپۆڕە روونیشی کردەوە؛ بەرزبوونەوەی بەهای دینار بەرامبەر بە دۆلار لەسەر ئاستی تاکدا باشە، هەرچەندە رەنگدانەوەیەکی ئەوتۆی نەبووە،چونکە گۆڕانکاری لە نرخەکاندا نەکردووە، بەڵام لەسەر ئاستی دەوڵەتدا عیراق زەرەرمەند دەبێت،چونکە عیراق مانگانە پێویستی بەبڕێکی زۆر بە دۆلار هەیە، بۆ ئەوەی بیخاتە بازاڕەوە و مووچەی فەرمانبەرانی پێدابین بکات.


گوڵاڵە سدیق لە بارەی هۆکاری راستەقینەی بەرزبوونەوەی بەهای دینار، روونی کردەوە؛پەیوەندی بە هەڵبژاردنەکانەوە هەیە کە محەمەد شیاع سودانی بەڵێنی داوە بەهای دینار نزیک بکاتەوە لە نرخی رەسمی، بۆیە بەرزبوونەوەی بەهای دینار پەیوەندی بە یەدەگی زێڕەوە نیە.

PUKMEDIA