سۆمۆ: هەرێم هەر بڕە نەوتێک هەناردە بکات وەریدەگرین

میدیاکان

کێڵگەیەکی نەوت

به‌ڕ‌ێوه‌به‌ری كۆمپانیای سۆمۆ رایده‌گه‌یه‌نێت:" هه‌رێمی كوردستان تاوه‌كو ئێستا هیچ بڕ‌ه‌ نه‌وتێكی هه‌نارده‌ نه‌كردوه‌، دووپاتیشی كرده‌وه‌:" هه‌رێمی كوردستان هه‌ر بڕ‌ێك نه‌وت له‌ئێستادا هه‌نارده‌ بكات وه‌ریده‌گرن".

عه‌لی نزار فایق به‌ڕ‌ێوه‌به‌ری گشتی كۆمپانیای به‌بازاڕ‌كردنی نه‌وت، ناسراو به‌ سۆمۆ له‌چاوپێكه‌وتنێكدا رایگه‌یاند:" هه‌رێم تائێستا هیچ بڕه‌ نه‌وتێكی هه‌نارده‌ نه‌كردووه‌ و كۆمپانیاكه‌یان هه‌موو رێكاره‌ گرێبه‌ستییه‌كانی بۆ هه‌نارده‌كردنی نه‌وت له‌ ڕ‌ێگه‌ی به‌نده‌ری جه‌یهانی توركیاوه‌ ته‌واو كردوه‌".

راشیگه‌یاند:"هه‌ر كێڵگه‌یه‌ك كه‌ بۆ ماوه‌یه‌ك به‌رهه‌مهێنان تێیدا راده‌گیرێت، یان به‌رهه‌می كه‌مده‌كرێته‌وه‌، راسته‌وخۆ ناتوانرێت دوای ده‌ستبه‌كاربوونه‌وه‌ به‌رهه‌مهێنانی زیاد بكرێته‌وه‌، هه‌روه‌ها له‌بودجه‌دا هه‌نارده‌كردنی نه‌وتی هه‌رێم به‌ 400 هه‌زار به‌رمیل دیاریكراوه‌، له‌ لێكتێگه‌یشتنه‌كه‌ی نێوان هه‌ردوو حكومه‌تیشدا به‌ 280 هه‌زار به‌رمیل نه‌وتی رۆژانه‌ دیارییكراوه‌ كه‌ 50 هه‌زار به‌رمیلی بۆ به‌كارهێنانی ناوخۆییه‌، بۆیه‌ وه‌ك قۆناغی سه‌ره‌تا هه‌رێمی كوردستان هه‌ر بڕ‌ه‌ نه‌وتێك كه‌ هه‌نارده‌ بكات، ئێمه‌ وه‌ریده‌گرین."

په‌یوه‌ست به‌ هه‌نارده‌ی رۆژانه‌ی نه‌وتیش، به‌ڕ‌ێوه‌به‌ری سۆمۆ ئاشكرایكرد:"هه‌نارده‌ی ڕ‌ۆژانه‌ی نه‌وتی عیراق له‌نێوان سێ ملیۆن و 350 هه‌زار به‌رمیل بۆ سێ ملیۆن و 400 هه‌زار به‌رمیلدایه‌، كه‌ رێژه‌ی 78% بۆ 80%ـی ده‌چێته‌ بازاڕ‌ه‌كانی ئاسیا، چونكه‌ بازاری گه‌شه‌سه‌ندون و به‌كارهێنانیان له‌ زیادبوندایه‌، له‌ كاتێكدا ئه‌وه‌ی ماوه‌ته‌وه‌ به‌سه‌ر بازاڕ‌ه‌كانی ئه‌وروپادا دابه‌شده‌بێت، هه‌روه‌ها كه‌متره‌ له‌ 20% و ئه‌وه‌شی ده‌مێنێته‌وه‌ بۆ ئه‌مریكایه‌".

هێرشه‌ درۆنییه‌كانی ماوه‌ی رابردووی سه‌ر كێڵگه‌ نه‌وتییه‌كانی هه‌رێمی كوردستان كاریگه‌رییان له‌سه‌ر دووباره‌ی ده‌ستپێكردنه‌وه‌ی هه‌نارده‌ی نه‌وتی هه‌رێمی كوردستان دروستكردووه‌و له‌ئێستادا حكومه‌تی هه‌رێمی كوردستان توانای ئه‌و بڕه‌ نه‌وته‌ی نییه‌ كه‌ له‌گه‌ڵ حكومه‌تی عیراق له‌سه‌ری رێككه‌وتووه‌ كه‌ بڕی 280 هه‌زار به‌رمیل نه‌وتی رۆژانه‌یه‌، به‌ڵام هه‌وڵه‌كانی حكومه‌تی هه‌رێم به‌رده‌وامه‌ بۆ دوورخستنه‌وه‌ی مه‌ترسییه‌كان و دووباره‌ ده‌ستپێكردنه‌وه‌ی هه‌نارده‌ی نه‌وت.

PUKMEDIA