ستران عەبدوڵڵا: ئەوانەی دژی بەپارێزگابوونی هەڵەبجەن شەرمەزارییان هەتا هەتاییە

PUKMEDIA

ستران عەبدوڵڵا ئەندامی سەرکردایەتی یەکێتیی نیشتمانیی کوردستان

ئەندامێکی سەرکردایەتی یەکێتیی نیشتمانیی کوردستان رایدەگەیەنێت:" ئاخر هەڵەبجە چیکردووە جگە لەوەی کە داوا دەکات ببێتە پارێزگایەکی عیراقی و زیاتر لەوەی هەیە تێکەڵ ناسنامەی وڵات بێت، خۆ بە پارێزگاربوونی هەڵەبجە ئینفیساڵی گوتەی عروبە و سەربەخۆیی دڵخوازی کوردستان نییە"، دەشڵێت:"داخۆ بۆچی پەرلەمانتارانی هەڵبژێردراوی پرۆسەیەکی سیاسیی نوێ دژی پرۆسەی کۆنی بەعسیزم وا دەکەن کە کیسەیان لەگەڵ کیسەی سەددامییەکان تێکەڵ بێت؟، ئەمانە کارەکتەری راگوزەرن کە ئازاریان کاتییە بەڵام شەرمەزاریان هەتا هەتاییە".


ستران عەبدوڵڵا ئەندامی سەرکردایەتی یەکێتیی نیشتمانیی کوردستان لە وتارێکدا کە لەبەشی بیروڕای وێبسایتی PUKMEDIA بەناونیشانی ( کیمیاوییەکەی هەڵەبجە کوێریان بکات)بڵاوکراوەتەوە نوسیویەتی:"هەوڵی بێوچانی هەندێک پەرلەمانتاری شۆڤێنی بۆ دەرکردنی بڕیارێکی وەلائی دژی بڕیاری بە پارێزگاکردنی هەڵەبجە، ئەمجارە بە ئازایەتی و دادپەروەری دادگای باڵای فیدراڵی پوچەڵکرایەوە و لە شوێنی خۆی راگیرا، بەڵام هێشتا هەر حەسرەتێکەو لە دڵدا ماوە کە چۆن نوێنەرانێک گوایە بە دیموکراسی و دەنگی گەلی عێراق چونەتە دەزگایەکی تەشریعی کەچی وەک فۆبیایەک لەگەڵ پرسەکانی کورد مامەڵە دەکەن و گیانی نزمی شۆڤێنی و کینەی نەتەوەیی چاوی کوێر کردوون" .

ئاماژە بەوەشدەکات:" داخۆ بۆچی پەرلەمانتارانی هەڵبژێردراوی پرۆسەیەکی سیاسیی نوێ دژی پرۆسەی کۆنی بەعسیزم وا دەکەن کە کیسەیان لەگەڵ کیسەی سەددامییەکان تێکەڵ بێت؟، ئاخر هەڵەبجە چیکردووە جگە لەوەی کە داوا دەکات ببێتە پارێزگایەکی عیراقی و زیاتر لەوەی هەیە تێکەڵ ناسنامەی وڵات بێت، خۆ بە پارێزگاربوونی هەڵەبجە ئینفیساڵی گوتەی عروبە و سەربەخۆیی دڵخوازی کوردستان نییە، بەڵکو تێکەڵبوونەوەیە لەگەڵ چارەنووسی وڵاتی عێراق و دەوڵەتێک کە لەرووی خاوەندارێتی مۆڕاڵییەوە بەرپرسە لە بەرامبەر ئازارەکانی هەڵەبجە و مەزڵومیەتەکەی".


"ئەمانە کارەکتەری راگوزەرن کە ئازاریان کاتییە بەڵام شەرمەزاریان هەتا هەتاییە" ستران عەبدوڵڵا لە وتارەکەدا وادەڵێت.

PUKMEDIA