كێشەی دابەشكردنی مووچەی هێزەكانی 70 چارەسەركرا

PUKMEDIA

لۆگۆی هێزەكانی 70

كێشەی دابەشكردنی مووچەی هێزەكانی 70 چارەسەركراو وتەبێژی هێزەكەش رایگەیاند: "200 ملیۆن دینار كورتهێنان لەمووچەی هێزەكانی 70 دا هەبوو، بەڵام بە هەوڵی بەشی ژمێریاری وەزارەتمان كێشەكە چارەسەركرا".

ئەحمەد لەتیف وتەبێژی هێزەكانی 70 لەلێدوانێكی تایبەتدا بە PUKMEDIA ی راگەیاند: "بەهۆی كورتهێنانی بڕی 200 ملیۆن دینار لەمووچەی مانگی شوباتی هێزەكانی 70 ، دابەشكردنی مووچەی مانگی شوبات بەسەر پێشمەرگەكانماندا دواكەت، بەڵام هەوڵەكانی ژمێریاری وەزارەتمان بەردەوام بوو بۆ چارەسەركردنی كێشەكەو پڕكردنەوەی ئەو كورتهێنانەو دواجار توانرا كێشەكە چارەسەر بكرێت و ئەمڕۆ دەستبەدابەشكردنی مووچەی هێزەكانی 70 دەكرێت".

"بڕیاریشە سبەینێ 20-3-2025، مووچەی خانەنشینی هێزەكانی 70 بۆ مانگی شوبات دابەشبكرێت" ئەحمەد لەتیف وایوت.

ئەمەش لەكاتێكدایە، چەند رۆژێكە دەست بە دابەشكردنی مووچەی مانگی شوباتی مووچەخۆرانی هەرێم كراوەو بڕیاربوو دوێنێ 18-3-2025 مووچەی هێزەكانی 70 لەچوارچێوەی وەزارەتی پێشمەرگەدا دابەشبكرێت بەڵام بەهۆی كورتهێنانەوە دابەشكردنی مووچەكانیان دواكەت.


PUKMEDIA