کورتهێنان مووچەی هێزه‌كانی 70 رادەگرێت

PUKMEDIA

دراوی عیراقی

هەتا ئێستا هێزەکانی 70ی سەر بە وەزارەتی پێشمەرگە مووچەی مانگی شوباتیان وەرنەگرتووە و وتەبێژی هێزەکەش دەڵێت:"200 ملیۆن دینار کورتهێنان لەمووچەی هێزەکەماندا هەیە".

چەند رۆژێکە دەست بە دابەشکردنی مووچەی مانگی شوباتی مووچەخۆرانی هەرێم کراوە و لەگەڵ ئەوەی بڕیاربوو دوێنێ 18-3-2025 مووچەی هێزەکانی 70 لەچوارچێوەی وەزارەتی پێشمەرگەدا دابەشبکرێت، بەڵام تا ئێستا هێزەکانی 70 مووچەیان پێنەدراوە.

ئەحمەد لەتیف وتەبێژی هێزەکانی ٧٠ لەلێدوانێکی تایبەتدا بە PUKMEDIA ی راگەیاند:" بەهۆی کورتهێنانی بڕی 200 ملیۆن دینار لەمووچەی مانگی شوباتی هێزەکانی 70 دا، هەتا ئێستا پێشمەرگەکانمان مووچەی مانگی شوباتیان وەرنەگرتووە".

"هەوڵەکانی ژمێریاری وەزارەتمان بەردەوامە بۆ چارەسەرکردنی کێشەکە و پڕکردنەوەی ئەو کورتهێنانە و هەرکاتێک کێشەکە چارەسەرکرا دەست بەدابەشکردنی مووچە دەکرێت"، ئەحمەد لەتیف وایوت.


وتەبێژی هێزەکانی 70 دەشڵێت: "هەموو مانگێک مووچەی پێشمەرگەکان وەک یەک نییە، هەندێک مانگ لێبڕین هەیە، جیا لەوەش مانگی کانوونی دووەم خانەنشینی هەندێک پێشمەرگەی گرتەوە و دواتر گۆڕانکاری بەسەردا هات و خانەنشین نەبوون، بۆیە بڕی 200 ملیۆن جیاوازی لەنێوان مووچەی مانگی یەک و دوو دا هەیە و پێویستە حکومەتی هەرێم لەداهاتی ناوخۆ کورتهێنانەکە پڕبکاتەوە".

ئەمەش لەکاتێکدایە رۆژی 12ی ئەم مانگە وەزارەتی دارایی و ئابووریی هەرێمی کوردستان خشتەی مووچەی مانگی شوباتی بڵاوکردەوە، رۆژی دواتر دەست بەدابەشکردنی مووچەکرا و رۆژی 18-3-2025 سەرجەم وەزارەتەکان جگە لەهێزەکانی 70 مووچەیان وەرگرت.

PUKMEDIA