د. ڕێواز فایەق ماڵئاوایی لە پەرلەمانی کوردستان دەکات

ئاژانسەکان

د.رێواز فایەق سەرۆکی پەرلەمانی کوردستان

بەبۆنەی کۆتایی هاتنی خولی پێنجەمی پەرلەمانی کوردستان، د. ڕێواز فایەق سەرۆکی پەرلەمانی کوردستان سەردانی بەشەکانی پەرلەمانی کوردستانی کرد و ماڵئاوایی لە فەرمانبەرەکانی کرد.

ئەمەش لە كاتێكدایە رۆژی 30-5-2023، دادگای باڵای فیدڕاڵی عیراق لەبارەی درێژكردنەوەی تەمەنی پەرلەمانی كوردستان بڕیاری كۆتایی دا و رایگەیاند، "درێژكردنەوەی تەمەنی پەرلەمانی كوردستان نادەستورییە و ئەو بڕیارانەشی لەماوەی درێژكردنەوەكەدا دراون پووچەڵن".

راشیگەیاند: "بە پێی دەستور هەرێم دەسەڵاتێكی فیدراڵییە و دەتوانێت یاساكانی فیدراڵی هەموار بكاتەوە و خولی هەڵبژاردنی پەرلەمانی تەنها چوار ساڵه و درێژكردنەوەی تەمەنی پەرلەمانی كوردستان پێچەوانەی دەستوره".

رۆژی 30-9-2018، هەڵبژاردنی پەرلەمانی كوردستان بەڕێوەچو و 29 لیست بەشداری هەڵبژاردنیان كرد، لە ئەنجامدا 16 لیست توانیان 111 كورسی پەرلەمان بەدەست بهێنن كە 11 كورسی هی كۆتاكانە.

د. رێواز فایەق حسێن كە لە  خولی پێنجەمدا بە سەرۆكی پەرلەمانی كوردستان هەڵبژێردرا، لە 1/7/1977 لە كەلار لەدایك بووە و هەڵگری بڕوانامەكانی بەكالۆریۆس لە یاسا و ماجستێر لەیاسای نێو دەوڵەتی تایبەت و دكتۆرا لەیاسای شارستانییە و پسپۆری و شارەزایی یاسای شارستانی، یاسای نێو دەوڵەتی تایبەت، یاسای وەبەرهێنانە.

 
پێشتریش یاریدەدەری دادوەری لەدادگای بەرایی دەربەندیخان و  لێكۆڵەری دادی بووە لەدادگای بەرایی دەربەندیخان، بەرپرسی بەشی یاسایی لەپەیمانگای تەكنیكی سلێمانی سەرۆكایەتی دەستەی خوێندنی تەكنیكی،  مامۆستای زانكۆ بووە.

 ئەندامی خولی چوارەمی پەرلەمانی كوردستان بووە لە فراكسیۆنی یەكێتی نیشتمانی كوردستان و لەو خولەدا بڕیاردەری لیژنەی پەروەردەو خوێندنی باڵا 2013 – 2018،  ئەندامی لیژنەی پیشەسازی وزەو سامانە سروشتییەكان 2013- 2017، ئەندامی لیژنەی یاسایی 2017- 2018. 

PUKMEDIA