دادگای فیدراڵی: هەر بڕیارێک لەماوەی درێژکردنەوەی پەرلەمانی کوردستان دا درابێت پووچەڵە

PUKMEDIA

ئەنجومەنی باڵای دادوەری عیراق

دادگای باڵای فیدڕاڵی عیراق لەبارەی درێژکردنەوەی تەمەنی پەرلەمانی کوردستان بڕیاری کۆتایی دا و رایگەیاند، "درێژکردنەوەی تەمەنی پەرلەمانی کوردستان نادەستورییە و ئەو بڕیارانەشی لەماوەی درێژکردنەوەکەدا دراون پووچەڵن".

ئەمڕۆ سێ شەممە ٣٠-٥-٢٠٢٣، دانیشتنی دادگای باڵای فیدڕاڵی عیراق لەبارەی درێژکردنەوەی تەمەنی پەرلەمانی کوردستانەوە بەڕێوەچوو، لە کۆبوونەوەکەدا دادگای فیدڕاڵی بڕیاری کۆتایی دا و رایگەیاند: "درێژكردنەوەی تەمەنی پەرلەمانی كوردستان نا دەستورییە و هەموو ئەو بڕیارانەی لە ماوەی درێژكردنەوەی پەرلەمان دەرچوون پووچەڵن".

دادگای فیدراڵی ئەوەشی راگەیاند: "به‌ پێی ده‌ستور هه‌رێم ده‌سه‌ڵاتێكی فیدراڵییه‌ و ده‌توانێت یاساكانی فیدراڵی هه‌موار بكاته‌وه‌ و خولی هه‌ڵبژاردنی په‌رله‌مانی ته‌نها چوار ساڵه و درێژكردنه‌وه‌ی ته‌مه‌نی په‌رله‌مانی كوردستان پێچه‌وانه‌ی ده‌ستوره".

سەبارەت بە بڕیارەکەی دادگای فیدراڵی، د. یوسف گۆران پسپۆڕ لە یاسای دەستووری، لە وتارێکدا کە لە بەشی بیروڕای PUKMEDIA بڵاوکراوەتەوە دەڵێت: "بەهۆی نەمانی بەرزترین دەسەڵاتی یاسادانان و پەکخستنی سەرجەم دامودەزگا فەررمییەکانی هەرێم (بە کۆمسیۆنیشەوە) بە بڕیاری ئەمڕۆی دادگای فیدڕاڵی عێراق ،لەبەر نەبونی دەستورێک لە هەرێم و هەروەها رێککەوتنێکی گشتگیر نێوان هێزە سیاسییەکان بۆ چۆنیەتی بەڕێوە بردنی قۆناخی ئایندە و دەربازبوون لەم بۆشاییە دەستوری و تەشریعی و دامەزراوەییە".

‎"لەبەر ئەم هۆکارانەی سەرەوە رەنگە لە ئێستادا باشترین بژاردە لەبەردەم هەرێمەکەمان رێکخستنی هەڵبژاردنێک بێ بۆ دەستنیشانکردنی ئەنجومەنێکی دامەزرێنەر(تاسیسی) بۆ هەرێم کە تیایدا ئەرکی سەرەکی ئەنجومەنەکە دانانی دەستورێک بێت بۆ هەرێم و پەسەند کردنی لەلایەن کۆمەڵانی خەڵکی کوردستانەوە لە راپرسییەکی سەرتاسەریدا"، پسپۆڕەکەی یاسای دەستووری وادەڵێت.

PUKMEDIA