سەرۆکی عەشیرەتی هەرکی: هەوڵی رفاندن و تیرۆرکردنم دراوە

PUKMEDIA

جەوهەر ئاغا هەرکی سەرۆکی عەشیرەتی هەرکی

سەرۆکی عەشیرەتی هەرکی لە کۆنگرەیەکی رۆژنامەوانیدا رایگەیاند: "لایەنێکی کوردستانی چەندین جار هەوڵی رفاندن و تیرۆرکردنمی داوە و لە دادگای فیدراڵی و نێودەوڵەتیش سکاڵام لەسەر چەند کەسایەتییەکی ناو ئەو حزبە کوردستانیە تۆمارکردووە کە بەڵگەمان لایە هەوڵی رفاندن و تیرۆرکردنی منیان داوە.

ئەمڕۆ سێ شەممە 14-2-2023، جەوهەر ئاغا هەرکی سەرۆکی عەشیرەتی هەرکی لە کۆنگرەیەکی رۆژنامەوانیدا رایگەیاند: "لە چەند رۆژی رابردوودا لەلایەن حزبێکەوە هەوڵی رفاندن و تیرۆرکردنم لە بەغدا درا، بەڵام پیلانی ناحەزانمان جێبەجێ نەکراو فەشەل بە پیلانە گڵاوەکەیان هات، ئەمە لەکاتێکدایە کە پێشتریش چەندین جار هەوڵی رفاندن و تیرۆرکردنم دراوە".

دەشڵێت: "لەلایەن حزبێکی کوردستانییەوە هەوڵی تیرۆرکردنم دەدرێت، بۆیە بە مافی خۆمی دەزانم کە سکاڵای یاسایی لەسەر ئەو کەسانە تۆمار بکەم کە لەناو ئەو حزبەدا ئەو پیلانە گڵاوەیان داڕشتووە، لەگەڵ ئەوەشدا داوا لەو حزبە دەکەم کە بە سیاسەتی چەوتی خۆیدا بچێتەوە و واز لەو کارە قێزەونانە بهێنێت".

ئاماژەی بەوەشدا: "من هیچ شتێک لەخۆمدا شک نابەم تەنها ئەوە نەبێت کە سەرۆکی عەشیرەتێکی دیاری کوردستانم و وەک هەندێک حزب بیرناکەینەوە، هەر بۆیە تاوانبارکردنم بە هەندێک بابەت کە دوور و نزیک ئێمە لێی ئاگادار نین لە چوارچێوەی ئەو پیلانەدایە کە بۆمان داڕێژراوە".

لەبارەی تۆمارکردنی سکاڵاکەشی لە بەغدا و دادگای نێودەوڵەتی سەرۆکی عەشیرەتی هەرکی وتی: "لامان وابووە لە دادگاکانی هەرێمی کوردستان ناتوانین مافی خۆمان وەربگرین، بۆیە سکاڵاکەمان بردوەتە دادگای فیدراڵی و دادگای نێودەوڵەتی، لەکاتێکدا تۆماتبارەکان لای ئێمە ناسراون و بەڵگەکان بۆ دادگا دەخەینەڕوو".
PUKMEDIA ئوسامە ئەبوبەکر