بۆ یەكەمجار كەشتیوانێكی چینی ماوەی ساڵێك لەبۆشایی ئاسماندا دەمێنێتەوە

ڕۆیتەرز

کەشتیوانانی چین ژو یانگژو، ژانگ ژیوان و لی جیاینگ

بڕیارە چین ئەركێكی نوێ بۆ وێستگەی بۆشایی ئاسمانی تیانگۆنگ دەستپێبكات، پێشبینیش دەكرێت كەشتیوانێك بۆ ماوەی ساڵێكی تەواو لەخولگەی ئاسمانیدا بمێنێتەوە، ئەمەش درێژترین ئەركی بۆشایی ئاسمانە لەمێژووی وڵاتەكەدا.

بڕیارە سەعات 11:08 دەقیقەی ئەمڕۆ 24ی 5ی 2026، ئەركی شێنژو-23 لەسەر موشەكێكی Long March-2F Y23 لە سەنتەری هەڵدانی مانگە دەستكردەكانی جیوكوان لەباكووری رۆژئاوای چین دەستپێبكات.

تیمەكە سێ كەسین، كەبریتین لە لی جیاینگ پسپۆڕی باری سوودبەخش كەدەبێتە یەكەم كەشتیوانی ئاسمانی لەهۆنگ كۆنگەوە بەشداری لەئەركێكی بۆشایی ئاسمانی چینیدا بكات، ئەندامەكانی دیكە بریتین لەفەرماندە ژو یانگژو و فڕۆكەوان ژانگ یوانژی كە هەردووكیان ئەندامی فەیلەقی ئاسمانی سوپای رزگاری گەلن.

بەپێی ئاژانسی بۆشایی ئاسمانی چین، كەشتیوانێك بۆ ماوەی ساڵێك لەكەشتی تیانگۆنگدا دەمێنێتەوە، ئەمەش بەپێی پێشكەوتنی ئەركەكە، ئەركە درێژخایەنەكە بە مەبەستی پشتگیریكردنە لەتوێژینەوەكان لەسەر كاریگەرییە درێژخایەنەكانی فڕینی بۆشایی ئاسمان لەسەر جەستەی مرۆڤ، لەوانە بەركەوتنی تیشك، لەدەستدانی چڕی ئێسك و فشاری دەرونی.

فراوانبوونی هەوڵەكانی چین بۆ گەیشتن بە بۆشایی ئاسمان لە كاتێكدایە، كە كێبڕكێی لەگەڵ ئەمریكا لەسەر گەیشتنە سەر مانگ لەداهاتوودا چڕتر دەبێتەوە، پەكین ئامانجی ئەوەیە پێش ساڵی 2030 نیشتنەوەی تیمی سەر مانگ ئەنجام بدات و تا ساڵی 2035 بنكەیەكی هەمیشەیی مانگ لەگەڵ رووسیا دابمەزرێنێت.

لەلایەكی دیكەوە، ناسا لەژێر پڕۆگرامی ئارتمیسدا، لە ساڵی 2028 دا دەیەوێت تیمێك بنێرێتە سەر مانگ، سەرەتای ئەمساڵ چوار كەشتیوانی ناسا لەكاتی ئەركی ئارتەمیس دووەمدا گەشتێكی مێژووییان بەدەوری مانگدا تەواوكردووە.

چین تا ئێستا تەنها رۆبۆتی بۆ سەر مانگ ناردووە، بەڵام پێشكەوتنە خێراكانی لەبواری تەكنەلۆژیای بۆشایی ئاسمان زیاتر سەرنجی نێودەوڵەتی بۆ لای خۆی راكێشاوە، لە مانگی حوزەیرانی ساڵی 2024 چین بووە یەكەم وڵات كە نموونەی مانگی لە دیوی دووری مانگەوە وەرگرتەوە.

میدیاكانی چین سەرەڕای ئەوەش بڵاویانكردەوە، كە زانایان تاقیكردنەوەیەك ئەنجام دەدەن كە وەك یەكەم تاقیكردنەوەی "كۆرپەی دەستكرد" لە جیهاندا لەبۆشایی ئاسمان وەسفكراوە، بە بەكارهێنانی نمونەی خانە بنەڕەتییەكانی مرۆڤ كەسەرەتای ئەم مانگە بۆ تیانگۆنگ نێردراوە بۆ لێكۆڵینەوە لەمانەوەی درێژخایەن و زاوزێی مرۆڤ لەژینگەكانی بۆشایی ئاسمان.

PUKMEDIA