یەکەم کاروانی حاجییانی سلێمانی لەفڕۆکەخانەی جەلال تاڵەبانییەوە بەڕێدەکەون بۆ سعودیە

PUKMEDIA

حاجیانی هەرێمی کوردستان

پڕۆسەی رۆیشتنی حاجییانی هەرێمی کوردستان بۆ خاکی عەرەبستانی سعوودییە بەردەوامیی هەیە و تا ئێستا هەزار حاجی هەرێمى کوردستان گەیشتوونەتە سعودیە، لێپرسراوی راگەیاندنی فڕۆکەخانە نێودەوڵەتی سلێمانی-ش دەڵێت:ئەمڕۆ لەمەراسیمێکی شایستەدا یەکەم کاروانی حاجیانی سنوری پارێزگای سلێمانی، لە فڕۆکەخانەی نێودەوڵەتی جەلال تاڵەبانییەوە بەمەبەستی بەجێگەیاندنی فەریزەی حەج بەڕێدەکەون بۆ عەرەبستانی سعودیە.

دانا محەمەد سەعید لێپرسراوی راگەیاندن و پەیوەندییەکانی فڕۆکەخانەی جەلال تاڵەبانی  بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: ئەمڕۆ لەمەراسیمێکی شایستەدا یەکەم کاروانی حاجیانی سنوری پارێزگای سلێمانی، لە فڕۆکەخانەی نێودەوڵەتی جەلال تاڵەبانییەوە بەمەبەستی بەجێگەیاندنی فەریزەی حەج بەڕێدەکەون بۆ عەرەبستانی سعودیە.

راشیگەیاند: ژمارەی کاروانی یەکەمی حاجییان، کە ئەمڕۆ بەڕێدەکەون 148 حاجییە و بڕیارە لەماوەی ئەم هەفتەیەشدا سەرجەم حاجییانی پارێزگاکانی سلێمانی و هەڵەبجە و ئیدارەی سەربەخۆی گەرمیان و راپەڕین لەڕێگەی فڕۆکەخانی جەلال تاڵەبانییەوە کە ژمارەیان 2 هەزار و 87 حاجییە بەڕێبکەون بۆ عەرەبستانی سعودیە.

لەلایەکی ترەوە، كاروان ستونی وتەبێژی حەج و عەمرەی هەرێم بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: دڵنیایی ده‌دەینه‌ ته‌واوی ئه‌و هاووڵاتیانه‌ی كه‌ ناویان بۆ حه‌جی ئه‌مساڵ ده‌رچووه،‌ به‌پێی ئه‌و خشته‌یەی كه‌ دانراوه‌ خشته‌ی چوونی حاجیان وه‌كو خۆی به‌بێ كێشه‌ و گرفت به‌رێوه‌ده‌چێت و رۆژی 17ی5ی2026 دوا كاروانی حاجیانی كوردستان ده‌گه‌نه‌ سعوودیه‌.

رۆژی 7ی ئایاری 2026، یەکەم کاروانی حاجیانی کوردستان بەرەو سعودیە بەڕێکەوتن و تا ئێستاش زیاتر له‌ هەزار حاجی كوردستان به‌ سه‌لامه‌تی گه‌یشتوونه‌ته‌ خاكی سعوودیه‌، به‌پێی خشته‌ی دیاریكراو تاوه‌كو رۆژی 17ی5ی2026 ته‌واوی حاجیانی كوردستان ده‌گه‌نه‌ سعوودیه‌.

ئەمەش لە کاتێکدایە، به‌گشتی له‌ عیراقدا بۆ وەرزى حەجى ئەمساڵ نزیكه‌ی 40 هه‌زار حاجی سه‌ردانی مه‌ككه‌ ده‌كه‌ن، كه‌ له‌و ژماره‌یه‌، پێنج هه‌زار و 120 حاجیان له ‌هه‌رێمی كوردستانه‌وه‌ گه‌شت ئه‌نجامده‌ده‌ن، هه‌روه‌ها هه‌زار و 262 حاجیان له‌ سنووری پارێزگای سلێمانییه‌، كه‌ 704 حاجییان له‌ ره‌گه‌زی نێرن و 558 حاجیشیان له‌ ره‌گه‌زی مێن.

PUKMEDIA