وەزارەتی پێشمەرگە: هاوکارییەکانی ئەمریکا رانەگیراوە

PUKMEDIA

لۆگۆی وەزارەتی پێشمەرگە

ماوەیەکە دەنگۆی وەستانی هاوکارییەکانی ئەمریکا بۆ هێزەکانی پێشمەرگە بڵاو بووەتەوە و وەزارەتی پێشمەرگەش رایدەگەیەنێت: ئەم دەنگۆیانە بێ بنەمان و پرۆسەی پاڵپشتییەکان بەردەوامن.

وەزارەتی پێشمەرگەی هەرێمی کوردستان، لە راگەیەندراوێکیدا دەنگۆی وەستانی هاوکارییەکانی رەتدەکاتەوە  و ئاماژە بەوەدەکات: ئەم دەنگۆیانە بێ بنەمان و پرۆسەی پاڵپشتییەکان بەپێی ئەو لێکتێگەیشتنە هاوبەشەی لە نێوان وەزارەتی جەنگی ئەمەریکا و وەزارەتی پێشمەرگە بەردەوامە کە لە پێناو سەرخستنی پرۆسەی چاکسازی و یەکخستنەوەی هێزەکانی پێشمەرگە واژۆ کراوە.

روونیشی کردووەتەوە: تەنیا هاوکارییەکانی شەڕی دژی تیرۆریستانی داعش وەستاون، ئەویش بەهۆی سنووداربوون و کەمبوونەوەی چالاکییەکانی تیرۆریستانی داعش.

وەزارەتی پێشمەرگە لە بارەی کۆتایی هاتنی هاوکارییەکان رایدەگەیەنێت: هاوکارییە دارایی و لۆجیستییەکانی ئەمەریکا، کە بەپێی خشتەیەکی کاتیی دیاریکراو، ڕێکخراون، دوا کاتی کۆتاییهاتنی ئەم لێکتێگەیشتنە، مانگی نۆی ساڵی 2026ـه.

لە کۆتایشدا، وەزارەتی پێشمەرگە ئاماژە بەوەدەکات: چاوەڕوان دەکرێت لە ماوەی ئایندەدا، گفتوگۆکردن بۆ ئیمزاکردنی لێکتێگەیشتنێکی نوێ لە نێوان هەردوولادا بێتە ئاراوە.

PUKMEDIA