دوای زیاتر لە 40 رۆژ دەوامی خوێندن دەستپێدەکاتەوە

PUKMEDIA

پرۆسەی خوێندن

دوای زیاتر لە 40 رۆژ راگرتنی دەوامی خوێندن لەپێناو بەرژەوەندی گشتیی، سبەینێ دەوامی خوێندکاران لەناو هۆڵەکانی خوێندن دەستپێدەکاتەوە.

لەڕاگەیەندراوێکی هاوبەشدا هەردوو وەزارەتی (خوێندنی باڵا و تویژینەوەی زانستی و وەزارەتی پەروەردە) بڕیاریاندا دەوامی سەرجەم ناوەندەکانی خوێندنی حکومی و ناحکومی وتایبەت لە هەرێمی کوردستان لەناو پۆل وکەمپەسەکان، لە ڕۆژی یەکشەممە 12ی 4 ی 2026 دەستپێبکاتەوە.

لەوچوارچێوەیەشدا وەزارەتی خوێندنی باڵا سەرجەم زانکۆ و پەیمانگەکانی ئاگادارکردەوە، دەرگای بەشە ناوخۆییەکان بکەنەوە و لەئەمڕۆوە خوێندکاران دەتوانن بگەڕێنەوە بۆ بەشە ناوخۆییەکانیان.

ئەمەش لەکاتیکدایە، رۆژی 28ی2ی2026 لەپێناو بەرژەوەندی گشتیی و پاراستنی سەلامەتی مامۆستایان و قوتابیان و خوێندکاران لە گشت ناوەندەکانی خوێندنی وەزارەتی پەروەردە و وەزارەتی خوێندنی باڵاو توێژینەوەی زانستی حکومەتی هەرێمی کوردستان، حکومی و ناحکومی و تایبەت و نێودەوڵەتیەکانیش دەوام راگیرا.

هاوکات، ڕۆژی 29ی3ی 2026 حکومەتی هەرێم جارێکی دیکە بڕیاریدا پرۆسەى خوێندن بەشێوازی ئامادەبوونی ناو پۆل ڕابگرێت و لە سەرجەم ناوەندەکانی خوێندنی پەروەردە و خوێندنی باڵا، خوێندن تەنیا بەشێوازی ئۆنلاین و دیجیتاڵیی بەردەوام بێت و  لەنوێترین بڕیاریشدا سبەینێ یەکشەممە 12ی 4 ی 2026 دەوامی خوێندنی لەناو هۆڵەکانی خوێندن دەستپێدەکاتەوە.

PUKMEDIA