بەدیجیتاڵکردنی فەرمانگە دادییەکانی کەرکوک تاوتوێ دەکرێت

وەزارەتی دادی عیراق

د. خالید شوانی و رێبوار تەها

ئەمڕۆ سێشەممە، د. خالید شوانی، وەزیری دادی عیراق، پێشوازی لە رێبوار تەها، پارێزگاری کەرکوک کرد و لە دیدارێکدا پەرەپێدانی هەماهەنگیی نێوان وەزارەت و حکومەتی خۆجێی کەرکوک بۆ بەرزکردنەوەی ئاستی خزمەتگوزارییەکان باسی لێوەکرا.

هاوکات جەختکرایەوە لەسەر مۆدێرنکردنی باڵەخانە و ژێرخانی فەرمانگە دادییەکانی پارێزگای کەرکوک و هەردوولا هاوڕابوون لەسەر ئاسانکردنی رێکارە کارگێڕییەکان بۆ ئەوەی هاووڵاتیان بە شێوەیەکی خێراتر مامەڵەکانیان رایی بکەن.

هاوکات  وەزیری داد ئاماژەی بە گرنگی جێبەجێکردنی سیستەمی ئەلیکترۆنی و مۆدێرن کرد، کە ئامانج لێی زیادکردنی شەفافیەت و کوالێتی خزمەتگوزارییەکانە.

ئەم هەنگاوانە لە چوارچێوەی پلانی حکومەتدایە بۆ چاکسازی لە دامەزراوەکانی دەوڵەت و باشترکردنی ئاستی خزمەتگوزارییە گشتییەکان لە سەرتاسەری وڵاتدا.

PUKMEDIA