فراکسیۆنی یەکێتی بەشداری دانیشتنی هەڵبژاردنی سەرۆککۆمار دەکات

فەرمانگەی راگەیاندنی ئەنجومەنی نوێنەران

دانیشتنی ئەنجومەنی نوێنەرانی عیراق

وتەبێژی فراکسیۆنی یەکێتی لەئەنجومەنی نوێنەرانی عیراق رایدەگەیەنێت: پەرلەمانتارانی یەکێتی بەشداری لە دانیشتنی ئەنجومەنی نوێنەران بۆ هەڵبژاردنی سەرۆککۆمار دەکەن، ئەمەش لەکاتێکدایە سەرۆکایەتی ئەنجومەنی نوێنەران رۆژی شەممە 11ی نیسانی بۆ هەڵبژاردنی سەرۆککۆمار دیاریکردووە.

دۆخی ناوچەکە پێویستی بە یەکلاییکردنەوەی پۆستەکانە

دیلان غەفور وتەبێژی فراکسیۆنی یەکێتی لەئەنجومەنی نوێنەرانی عیراق بەوێبسایتی رەسمیی یەکێتیی نیشتمانیی کوردستان PUKMEDIA رایگەیاند: پەرلەمانتارانی یەکێتی بەشداری لە دانیشتنی ئەنجومەنی نوێنەران بۆ هەڵبژاردنی سەرۆککۆمار دەکەن و پێمان وایە دۆخی ناوچەکە پێویستی بە یەکلاییکردنەوەی پۆستەکان هەیە.

راشیگەیاند: کۆی ئەو ئیمزایانەی کە بۆ دانیشتنی ئەنجومەنی نوێنەران کۆکراوەتەوە بۆ هەڵبژاردنی سەرۆککۆمار، رێژەی یاسایی تێپەڕاندووە.

وتەبێژی فراکسیۆنی یەکێتی لەئەنجومەنی نوێنەرانی عیراق ئاماژە بەوەشدەکات، دۆخی ئێستا و شەڕی بەردەوامی ناوچەکە پێویستی بە پێکهێنانی حکومەتێکی بەهێز هەیە، بۆئەوەی رووبەڕووی لێکەوتە سیاسی و ئابوری و ئەمنییەکان ببێتەوە، بۆ ئەمەش پێویستە رێککارە یاساییەکان بۆ پێکهێنانی حکومەت تەواو بکەین.

وادەی هەڵبژاردنی سەرۆککۆمار دیاریکرا

هاوکات، لەکۆبوونەوەیەکدا سەرۆکایەتی ئەنجومەنی نوێنەرانى عیراق رۆژی 11ى4ى2026 ى بۆ دانیشتنی هەڵبژاردنی سەرۆککۆمار دیاریکرد و داوای لە سەرۆکی کوتلە سیاسییەکان کرد، بەرپرسیارێتی خۆیان هەڵگرن، لە تەواوکردنی ئەو ئیستحقاقە دەستورییە و پێکهێنانی حکومەتێک کە لە توانایدابێت بەرەنگاری ئاڵنگارییەکان ببێتەوە.

یەکێتیی نیشتمانیی کوردستان بەگوێرەی رێککەوتن و نەریتە سیاسییەکان ئەو پۆستە وەک رابردوو بە ئیستحقاقی خۆی دەزانێت و بۆ ئەمەش نزار ئامێدی وەک تاکە کاندیدی رەسمیی خۆی بۆ وەرگرتنی پۆستی سەرۆککۆمار پێشکەش بە ئەنجومەنی نوێنەران کردووە.

لەدوای رووخانی رژێمی پێشووی عیراقەوە، بەگوێرەی رێککەوتن و نەریتە سیاسییەکان ئەو پۆستە وەک پشکی یەکێتیی نیشتمانیی کوردستان دیاریکراوە و لەڕابردووشدا رەوانشاد سەرۆک مام جەلال و د.فواد مەعسوم و د.بەرهەم ئەحمەد ساڵح و د.لەتیف رەشید لەسەر پشکی یەکێتی ئەو پۆستەیان وەرگرتووە، بۆ ئەم خولەش یەکێتیی نیشتمانیی کوردستان نزار ئامێدی وەک تاکە کاندید بۆ ئەو پۆستە دیاریکردووە.

ئەمەش لەکاتێکدایە، رۆژی 11ی11 ساڵی رابردوو هەڵبژاردنی ئەنجومەنی نوێنەرانی عیراق ئەنجامدراو، لەوکاتەوە تا ئێستا کە نزیکەی 5 مانگە نە حکومەتی نوێی عیراق پێکهێنراوە و نە سەرۆککۆماری عیراق هەڵبژێردراوە.

PUKMEDIA