وەزارەتی بازرگانی: گەیشتووینەتە حاڵەتی خۆبژێوی

میدیاکان

گەنم

وەزارەتی بازرگانی عیراق، رایدەگەیەنێت گەیشتووینەتە خاڵی خۆبژێوی و دووپاتیشی دەکاتەوە هەموو رێکارێکی پێویستیان بۆ وەرگرتنی گەنمی ئەمساڵ گرتووەتە بەر.

حەیدەر نوری گەرعاوی بەڕێوەبەری کۆمپانیای گشتی بازرگانی دانەوێڵە، رایگەیاند:کۆمپانیای گشتی بۆ بازرگانی دانەوێڵە هەموو ڕێکارێکی پێویستی گرتووەتەبەر بۆ وەرزی ئێستای بەبازاڕکردنی گەنم، هەروەها سەرجەم کۆگاکانی پارێزگاکان بۆ وەرگرتنی گەنمی ئەمساڵ ئامادەکراون.

ئاماژەی بەوەشکرد: بەپێی پێشبینییەکان بۆ ئەمساڵ دەگەینە خاڵی خۆبژێوی، بەپێی ئەو بڕەی کە وەزارەتی کشتوکاڵ دیاریکردووە، کە لە نێوان  4 بۆ 4.5 ملیۆن تۆندایە، ئەم بڕەش بەشی تەواوی پێداویستییەکانی عیراق دەکات.

لەبارەی کۆگاکردنی گەنمیش، حەیدەر نوری گەرعاوی، رایگەیاند: کۆگاکردنی گەنم لەسەرجەم پارێزگاکان دەبێت، هەروەها دەتوانین بەهۆی ئەو کۆگایەنەوە تەواوی گەنمی جوتیاران وەربگرین.

لە بارەی شایستە داراییەکانی جوتیارانیش، حەیدەر نوری گەرعاوی بەڕێوەبەری کۆمپانیای گشتی بازرگانی دانەوێڵە ، رایگەیاند: دیاریکردنی میکانیزم و کاتی خەرجکردنیان لە ئەستۆی وەزارەتی داراییە، کە ئەرکی دابین کردنی لە ئەستۆ گرتووە.

PUKMEDIA