قوباد تاڵەبانی: راگەیاندنی یەكێتی پەیامی حزبەكەی بەخەڵك بگەیەنێت

راگەیاندنی قوباد تاڵەبانی

قوباد تاڵەبانی و لێپرسراوانی دەزگاکانی راگەیاندنی یەکێتی

قوباد تاڵەبانی، لێپرسراویی مەکتەبی سکرتارییەتی سەرۆک مام جەلال، سەردانی مەکتەبی راگەیاندنی یەکێتی کرد و بە ئامادەبوونی عیماد ئەحمەد، لێپرسراویی مەکتەبی راگەیاندن و هۆشیاری و لەتیف نێروەیی، لێپرسراویی بۆردی راگەیاندن، لەگەڵ بەرپرسانی دەزگاکانی راگەیاندن و ئەندامانی مەکتەبی راگەیاندن کۆبووەوە.

لە کۆبوونەوەکەدا کە رۆژی یەکشەمە(29/3/2026) بەڕێوەچوو، قوباد تاڵەبانی سوپاس و دەستخۆشی لە راگەیاندکاران و ئەندامانی مەکتەبی راگەیاندن کرد لەپای هەوڵ و ماندووبوونیان بۆ گەیاندنی پەیام و سیاسەتی یەکێتیی نیشتمانیی کوردستان بە کۆمەڵانی خەڵكی کوردستان و داواشی لێ کردن بەپێی گۆڕانکارییەکانی سەردەم، راگەیاندنی یەکێتی نوێ بکەنەوە و لەمبارەیەشەوە ئامادەیی خۆی بۆ هەموو جۆرە پشتگیری و هاوکارییەک دەربڕی.

هەر لەم چوارچێوەیەدا، لێپرسراویی سکرتارییەتی سەرۆک مام جەلال، رایگەیاند یەکێتی هێزێکی گەورە و کاریگەرە لە کوردستان و عیراق و ناوچەکەدا، هەربۆیە دەبێت راگەیاندنی یەکێتیش بە جۆرێک خۆی نوێ بکاتەوە کە بتوانێت بە شێوەیەکی کاریگەر دەنگ و پەیامی یەکێتی بە خەڵکی کوردستان و عیراق و ناوچەکە بگەیەنێت.

PUKMEDIA