لقی سلێمانی سەندیكای رۆژنامەنووسان: تەنھا خەڵكانی پسپۆڕ لەمیدیاوە قسە لەسەر جەنگ بكەن

PUKMEDIA

لقی سلێمانی سەندیكای رۆژنامەنووسانی كوردستان

لقی سلێمانی سەندیكای رۆژنامەنووسانی كوردستان رایدەگەیەنێت: لەم جەنگەدا زۆرترین خەڵك تەماشای میدیا دەكەن، بۆیە رەچاوكردنی باری دەرونی خێزانەكان لە ھەموو كات پێویست ترەو تەنھا خەڵكانی پسپۆڕو شارەزا لە میدیاوە قسە لەسەر جەنگ و شیكار و لێكەوتەكانی بكەن و لەم بارودۆخەدا میدیاكان پرس و را بە پزیشكانی دەرونی بكەن ئەگەر كەناڵەكان راوێژكاری دەرونییان نەبوو.

لقی سلێمانی سەندیكای رۆژنامەنووسانی كوردستان، كۆمەڵێك رێنمایی خۆپارێزیی لە كاریگەرییەكانی جەنگی دەرونی بڵاوكردەوەو رایگەیاند: لەگەڵ ھەموو جەنگەكاندا ھاوكات جەنگێكی شاراوە پیادە دەكرێت، پێی دەوترێت (جەنگی دەرونی)، لەزۆر شوێنی مێژوودا جەنگی دەرونی بووەتە ھۆكاری دۆڕاندن یان بردنەوەی جەنگەكان، چونكە كاریگەرییەكانی ئێجگار روخێنەرو ترسناكن.

راشیگەیاندووە: بۆیە داوا لە وەرگرانی میدیاكانمان (بینەران و بیسەران و خوێنەران و بەكارھێنەرانی سۆشیاڵ میدیا) و لە سەرجەم كەناڵەكانی ھەرێمی كوردستانیش (بینراو بیستراو خوێنراو ئەلكترۆنی) دەكەین، وەك ھاووڵاتی و وەك میدیاكار زۆر بە گرنگییەوە رەچاوی ئەم خاڵانەو ئەم رێنماییانەمان بكەن.. ئەم خاڵانە لە چوارچێوەی راسپاردەكانی سیمپۆزیۆمی ھاوبەشی (تەندروستی دەرونی و رۆڵی میدیا) وەرگیراون، بەدەیان پزیشكی دەرونی و دەرونناس و میدیاكار ئامادەی بوون، كارێكی ھاوبەش بوو لە نێوان كۆمەڵەی پزیشكی دەرونی كوردستان و سەندیكای رۆژنامەنووسانی كوردستان لقی سلێمانی و زانكۆی سلێمانی و كۆلێژی پزیشكی ئەنجامدرا، پسپۆڕانی دەرونی ئاماژەی ترسناكیان بە رۆڵی جەنگی دەرونی و كاریگەریەكانی میدیای ناوخۆو میدیای بەرانبەر كردوە.. ھیوادارین بە گرنگی و بە وردی بخوێنرێنەوەو پەیڕەو بكرێن، چونكە پێشتر ھیچ شارەزاییەكمان لە جەنگی دەرونی نەبوەو ئێستاش چ ھاووڵاتیان چ میدیاكان خەریكە وەك لایەنێكی جەنگەكە رەفتار بكەین بۆیە ئەم رێنماییانە زۆر بە گرنگ دەزانین:

1/ تەنھا خەڵكانی پسپۆڕو شارەزا لە میدیاوە قسە لەسەر جەنگ و شیكار و لێكەوتەكانی بكەن.

2/  لەم بارودۆخەدا میدیاكان پرس و را بە پزیشكانی دەرونی بكەن ئەگەر كەناڵەكان راوێژكاری دەرونییان نەبوو.

3/ لەم جەنگەدا زۆرترین خەڵك تەماشای میدیا دەكەن، بۆیە رەچاوكردنی باری دەرونی خێزانەكان لە ھەموو كات پێویست ترە.

4/ تۆنی دەنگی بەرزی بێژەرەكان و نەڕەكردن و ھاتوھاوار پێویست ناكات، چونكە ئێمە لایەنی شەڕكەر نین و تەنھا ھەواڵ دەگوازینەوە.

5/ كەمترین گەورەكردن و قەبەكردن بۆ زمانی ھەواڵ و راپۆرتەكان بكرێت و ئاوەڵناوی دێواندن بۆ جۆری چەكەكان بەكار نەھێنن.

6/ بەرپرسیارانە و كەمترین رەفتار لەگەڵ وێنەو وشەو زاراوەی خوێن و بریندار و كوژراو بێسەروشوێن و داروپەردوو تەقاندن و ئەتۆمی و ......ھتد بكەن.

7/ ھەر زانیارییەك لێكەوتەی دەرونی خراپی لێبكەوێتەوە، یان بڵاو نەكرێتەوە یان شێوازی داڕشتنەكەی بخرێتە سەر شێوازی ئاسانكردنەوەی زانیاری.

8/ داوادەكەین كۆمەڵەی پزیشكی دەرونی كوردستان، لەژێر رۆشنایی راسپاردەكانی سیمپۆزیۆمی پێشووماندا، وردبوونەوەی دەرونی و كاریگەریی میدیاكان لە قۆناغی چوار ھەفتەی شەڕدا بۆ شەقام بخاتە روو.

9/ ئەو پەیج و ئەكاونتانەی سەرچاوەو خاوەندارێتییان ئاشكرانین، داواكارین ھاوكارمان بن و رەچاوی باری دەرونی خوێنەرەكانیان بكەن.

10/ ھەموان دەزانین كە ئامانجی جەنگی دەرونی كۆنترۆڵكردنی عەقڵ و بیرو دڵی خەڵك و شكست پێھێنانی لایەنی بەرانبەرە، ئێمەش لە نێوان ھەردوولایەنی شەڕكەرداین، بۆیە پێویستە بە عەقڵ بەرپەرچی ئەم ھێرشە دەروونیانە بكەینەوەو راگرتنی باری دەرونی ھاووڵاتیان لە ئەركە پێشینەو گرنگەكانی میدیای كوردی بێت.

PUKMEDIA