لەگەڵ پەرەسەندنی گرژییەکان نرخی نەوت و کانزاکان بەردەوامن لە بەرزبوونەوە

AI

نرخی نەوت و زێڕ

بەهۆی گرژییە سەربازییەکانی نێوان وڵاتان، نرخی وزە و کانزاکان لە بازاڕەکانی جیهاندا بە شێوەیەکی بەرچاو بەرزبوونەوەی بەخۆوە بینیووە، بەجۆرێک نرخی یەک بەرمیل نەوتی برێنت لە %9 و نرخی یەک بەرمیل نەوتی خاوی تەکساس %7 بەرزبووەتەوە.

ئەمڕۆ 2ی3ی2026 نرخی نەوت لەبازاڕەکانی جیهان بەرزبوونەوەی بەخۆوە بینی، بەجۆرێک نرخی یەک بەرمیل نەوتی برینت بە 76 دۆلار و 27 سەنت و یەک بەرمیل نەوتی تەکساس بە 69 دۆلار و 82 سەنت مامەڵەی پێوەدەکرێت.

هۆکاری بەرزبوونەوەی نرخی نەوت دەگەڕیتەوە بۆ ئەوەی تەواوی هاتووچۆی کەشتییەکان لە تەنگەی هورمز (کە %20ی نەوت و گازی جیهانی پێدا تێپەڕ دەبێت) دوای هێرشەکانی ئێران بۆ سەر سێ کەشتی پەکیکەوتووە.

هاوکات بانکی "مۆرگان ستانلی" پێشبینی دەکات نرخی نەوتی برێنت لە وەرزی دووەمدا بگاتە 80 دۆلار و  شیکەرەوەکانی "سیتی گروپ"یش پێیان وایە ئەگەر دۆخەکە بەردەوام بێت، نرخەکە لە نێوان 80 بۆ 90 دۆلار جێگیر دەبێت.

لەلایەکی ترەوە بەهۆی مەترسییەکانی جەنگ، وەبەرهێنەران روویان لە کڕینی زێڕ و کانزاکان کردووە و ئەمەش نرخی زێڕ و زیوی بەرزکردووەتەوە.

نرخی زێڕ بەرزدەبێتەوە

ئەمڕۆ 2ی3ی2026 نرخی هەر ئۆنسەیەک زێڕ گەیشتە 5 هەزار و 390 دۆلار.

هاوکات نرخی هەر ئۆنسەیەک زیو گەیشتە 95 دۆلار و 35 سەنت و پلاتین و پەلادیۆمیش بەڕێژەی کەمتر لە 1% بەرزبوونەوەی بەخۆوە بینیوە.

ئەمەش لەکاتێکدایە، جیهان چاوەڕێی گۆڕانکارییە سیاسییەکانە؛ شیکەرەوەکان پێیان وایە یان دەبێت گۆڕانکاری لە سەرکردایەتی ئێراندا رووبدات، یان ئەمریکا فشارەکان کەم بکاتەوە بۆ ئەوەی بازاڕەکان ئارام ببنەوە.

PUKMEDIA