لە یادی 22 ساڵەی كۆچی دوایی خەلیل دۆسكی سەركردەدا

ئەرشیف

سەركردەی نەمر لیوا خەلیل دۆسكی

سەركردەی نەمر لیوا خەلیل دۆسكی، یەكێكە لەو سمبولە درەوشاواوانەى شۆڕشی نوێ، ئەو پێشتر لە دەزگا و دامەزراوە چەكدارییەكانی دەوڵەتدا وەك ئەفسەرێك پێگەی هەبوو، دواتر پەیوەندی بە ریزەكانی شۆڕشەوە كرد و بە زانستەکەی خزمەتی سەنگەری بەرگریی نەتەوەكەی كرد.

لیوا خەلیلی نەمر ئەفسەرێكی ئەكادیمی و رۆشنبیرێكی بواری پۆلیس و سەربازیی بوو، سەردەم و بارودۆخ وابوو كە دەبێت درێژە بە خوێندن بدات و لە دوای تەواوكردنی خوێندنیش بچێتە سلكی سەربازییەوە، ئەم واقیعەش رێگرنەبوو لەوەی وەك كوردێكی دڵسۆز بیربكاتەوە، هەر ئەوەش بوو كە توانی سوود لەو دەرفەتەی هاتۆتەپێشی وەربگرێت و دواتر لە كاروانی خەباتی نەتەوەكەیدا بەكاری بهێنێت.

بە زانست و زانیارییە سەربازییەكەی، گڕوتینی زیاتری بە هێزی پێشمەرگە بەخشی،  بە تایبەتی دوای راپەڕین و لە كاتی مەشق و رێكخستنەوەى هێزی پێشمەرگە. 

ئەم سەركردە نەمرە ناوی تەواوی خەلیل نیعمەت دۆسكی-یە، لە دایکبووى ساڵی 1954 ى شارى دهۆکە، قۆناغەكانی خوێندنی سەرەتایی و ناوەندی و ئامادەیی لەو شارە تەواوكردووە، ساڵی 1975 كۆلێژی پۆلیسی عیراقی تەواوكرد و بووە ئەفسەر، لە ساڵی 1978 پەیوەندی بە رێكخستنەكانی یەكێتیی نیشتمانیی كوردستانەوە کرد، ئەگەرچی لە پێگەیەكی هەستیاردا بووە و مەترسیی زۆری لەسەر بووە، بەڵام دڵسۆزانە و بێسڵەمینەوە درێژەی داوە بە خەباتی نهێنی و چالاكانە، ئەركەكانی رێكخستنی راپەڕاندووە، ساڵی 1985 بۆتە پێشمەرگە و كراوەتە ئەندامی مەكتەبی عەسكەری.

لە كاتی شاڵاوەكانی ئەنفال بۆسەر دۆڵی جافایەتی و بارەگاكانی سەركردایەتیی شۆڕش، فەرماندەیەكی ئازاو بەتوانا بوو، لە زۆرێكیش لە شەڕ و داستانەكان دژی سوپای رژێمی بەعسی داگیركەر، بەشداربووە.

لە راپەڕینە مەزنەکەی ساڵی 1991دا وەک لێپرسراوی سەربازیی ناوچەی بادینان رۆڵێکى مێژوویى گێڕا و دوای راپەڕین لە چەند پۆستێگی باڵاى وەكو بەڕێوەبەری ئاسایشی گشتیی پارێزگای دهۆك، ئەندامی مەڵبەندی چواری یەكێتیی نیشتمانیی كوردستان، ئەندامی فەرماندەیی گشتیی هێزی پێشمەرگەی كوردستان خزمەتى دەکرد، ساڵی 1996یش پلەی سەربازیی بەرزكرایەوە بۆ لیوا و ئەندامی سەركردایەتیی ی.ن.ك و وەزیری گواستنەوە و گەیاندنی حكومەتی هەرێم -ئیدارەی سلێمانى بوو.

بەردەوام لە هەوڵی ئەوەدا بوو هێزی پێشمەرگەی كوردستان بكاتە هێزێكی نیزامی و لە بنكەكانی مەشقدا، سەرباز و جەنگاوەری بەدیسپلین بۆ پارێزگاری لە خاكی كوردستان پەروەردە بكات.

 ئەم سەرکردە کەم وێنەیە رۆژی 29/2/2004  بەهۆی نەخۆشییەوە لە نەخۆشخانەی ئازادیی شاری دهۆك كۆچی ماڵئاوایى کرد و رۆژی 1/3/2004 لە رێوڕەسمێكی شایستەدا تەرمەكەی لە گۆڕستانی (شاخكێ) بەخاكسپێردرا.

دوا پلەشی ئەندامی سەركردایەتیی یەكێتیی نیشتمانیی كوردستان و وەزیری گواستنەوە و گەیاندنی حكومەتی هەرێمی كوردستان بوو.

PUKMEDIA