وەفدێکی باڵای دیبلۆماسی و بازرگانی ئیتاڵیا سەردانی سلێمانی دەکات

PUKMEDIA

کۆبونەوەی وەفدێکی باڵای دیبلۆماسی و بازرگانی ئیتاڵی و خاوەنکار و بازرگانان و سەرمایەدارانی سلێمانی

ئەمڕۆ وەفدێکی باڵای دیبلۆماسی و بازرگانی ئیتاڵی کە سەردانی سلێمانیان کردووە، لەگەڵ خاوەنکار و بازرگانان و سەرمایەدارانی سلێمانی کۆدەبنەوە، کە لەلایەن قوباد تاڵەبانییەوە رێکخراوە و ژمارەیان 17 بازرگانە.

عەزیز سەعید راوێژکاری جێگری سەرۆکوەزیرانی حکومەتی هەرێمی کوردستان بە گەلی کوردستانی رایگەیاند: لەسەروبەندی پەیوەندییە نوێیەکان کە پەیوەندی بەهەرێمەوە هەیە، چەند وەفدێک سەردانی هەرێم دەکەن و دەیانەوێت لەنزیکەوە خاوەنکار و بازرگانان و سەرمایەدارانی سلێمانی ببینن، کە خاوەنی کارگە و بابەتی گرنگن لەبوارەکەدا، تاوەکو شێوەی کارەکانیان بزانن تا لەداهاتوودا بتوانن سوود لەیەکتر وەربگرن و کاری هاوبەش بکەن.

راشیگەیاند: بەپێی ئەو ئەمن و ئاسایشەی لێرە هەیە، وەبەرهێنەرانی جیهان دەتوانن بە ئاسانی سەردانی ئێمە بکەن، پێویستە ئێمەش بۆیان بسەلمێنین خاوەنی کۆمەڵێک کارگە و وەربەرهێنانین لەسلێمانی و لەو رووەوە پێشکەوتنی زیاترمان بەخۆوە بینیوە، هاوکات ئەمڕۆش کۆبوونەوەیەکی گرنگیان لەگەڵ رێکدەخرێت کە لەلایەن قوباد تاڵەبانییەوە رێکخراوە و دوێنێش خۆی لەگەڵیان کۆبووەتەوە.

راوێژکاری جێگری سەرۆکوەزیرانی حکومەتی هەرێم ئاماژەی بەوەشکرد: سلێمانی خاوەنی کۆمەڵێک کارگەی کارگەی گرنگە و بە یەکەمی عیراق دادەنریت لەڕووی پیشەسازییەوە لەسەرجەم سێکتەرەکاندا، ئەمەش بۆ وەفدەکە گرنگە.

ئەمەش لەکاتێکدایە، هەر لەچوارچێوەی پێشکەوتنی شاری سلێمانی لەڕووی بازرگانییەوە، رۆژی 7ی2ی2026 قوباد تاڵەبانی جێگری سەرۆکوەزیران، پێشوازیکرد لە وەفدێکی بازرگانیی سعودییە بە سەرۆکایەتیی محەمەد سلێمان ئەلعسیری، کونسوڵی گشتیی ئەو وڵاتە لە هەرێمی کوردستان و پێکەوە تاوتوێی چۆنییەتی پەرەپێدانی پەیوەندییە ئابوورییەکانی نێوان هەردوولایان کرد و لە بەشێکی دیکەی کۆبوونەوەکەدا باسیان لە گرنگیی رۆڵی کەرتی تایبەت کرد لە ئابووریی هەرێمی کوردستان و پارێزگای سلێمانی کە لەم ساڵانەی دواییدا کەرتی تایبەت بە شێوەیەکی بەرچاو بەهێز بووە و رۆڵی بنەڕەتی دەبینێت لە گەشەپێدانی ئابووریدا.

PUKMEDIA