سودانى داوا لە دەزگاکانى حکومەت دەکات خەرجییەکان کەم بکەنەوە

PUKMEDIA

لۆگۆى حکومەتى عیراق

بە مەبەستى كه‌مكردنه‌وه‌ی خه‌رجییه‌كان، سه‌رۆك وه‌زیرانی عیراق له‌ نوسینگه‌كه‌ی خۆیه‌وه‌ ده‌ستپێكرد و داواش له‌ دام و ده‌زگاكانی دیكه‌ی حكومه‌ت ده‌كات خه‌رجییه‌كان كه‌م بكه‌نه‌وه‌.

نوسینگه‌ی ر‌اگه‌یاندنی سه‌رۆك وه‌زیرانی عیراق، زنجیره‌یه‌ك بڕ‌یاری نوێی بۆ كه‌مكردنه‌وه‌ی خه‌رجییه‌كانی حكومه‌ت و ر‌ێكخستنه‌وه‌ی میلاكاتی نوسینگه‌ی سه‌رۆك وه‌زیران ر‌اگه‌یاند و بڕ‌یاریداوه‌ به‌ كۆتاییهێنان به‌ گرێبه‌ستی ژماره‌یه‌ك ر‌اوێژكار و پسپۆڕ‌ كه‌ ئه‌ركی به‌ڕ‌ێوه‌بردنی چه‌ند دۆسیه‌یه‌كی گرنگیان پێسپێردراوە و رێژه‌ی جێبه‌جێكردنی ئه‌و دۆسیانه‌ گه‌یشتووه‌ته‌ (88٪) و ئامانج لێی كه‌مكردنه‌وه‌ی بارگرانی داراییه‌ له‌سه‌ر بودجه‌ی به‌كاربردن.

هه‌روه‌ها سوودانی جه‌ختی له ‌سه‌رجه‌م داموده‌زگاكانی حكومه‌ت كردووه‌ته‌وه،‌ كه‌ پێویسته‌ بۆ كه‌مكردنه‌وه‌ی خه‌رجییه‌ ناپێویسته‌كان پابه‌ندی بڕ‌یاره‌كانی ئه‌نجومه‌نی وه‌زیران بن و ئامانجی ئه‌م ر‌ێوشوێنانه‌ گه‌یشتنه‌ به‌ كه‌مكردنه‌وه‌یه‌كی ر‌وونی خه‌رجییه‌كان و به‌كارهێنانی سه‌رچاوه‌ داراییه‌ به‌رده‌سته‌كان به‌ باشترین شێوه‌ له‌ خزمه‌تی به‌رنامه‌ی حكومه‌تدا.

ئەمەش لە کاتێکدایە، رۆژى 7ى کانوونى دووەمى رابردوو ئەنجومەنى وەزیرانى عیراق چەند راسپاردەیەکى ئەنجومەنى وەزارى ئابورى پەسەند کرد، کە ئامانج لێى کەمکردنەوەى خەرجى بەکاربردن و زیادکرنى داهاتى دەوڵەت بوو.

PUKMEDIA