عیراق.. پێنجەم زیانلێکەوتووترین وڵاتە بەهۆی کەشوهەواوە

دەستەى پاراستن و ژینگەى هەرێم

وێنەیەکى خۆڵبارین

دەستەى پاراستن و ژینگەى هەرێم بڵاویکردەوە، کە عیراق لەسەر ئاستی جیهان پلەی پێنجەمی زیانلێکەوتووترین وڵاتانی بەهۆی گۆڕانی کەشوهەواوە گرتووە، کە بووەتە هۆی وشکەساڵییەکی درێژخایەن و بەرزبوونەوەی مەترسیداری پلەکانی گەرما.

لە بڵاوکراوەکەدا هاتووە، گۆڕانی کەشوهەوا لە عیراق تەنها کێشەیەکی ژینگەیی نییە، بەڵکو هەڕەشەیەکی راستەوخۆیە بۆ سەر ئاسایشی خۆراک و ئاو، بەرزبوونەوەی خێرای پلەکانی گەرما و کەمبوونەوەی سەرچاوەکان، فشارێکی گەورە لەسەر کەرتی وزە و تەندروستیی گشتیی دروست دەکات، کە ئەمەش پێویستیی بە گۆڕینی بنەڕەتیی سیستەمی ئاودێریی و بەڕێوەبردنی سەرچاوە سروشتییەکان هەیە تاوەکو رێگریی لە کۆچی بەکۆمەڵی دانیشتووان بگیریێت.

ئاماژەی بە ئەوەش داوە، رێژەی بارانبارین لە 30 ساڵی رابردوودا بە ڕێژەی 35% کەمی کردووە، ساڵانە بڕی 3 ملیار مەتر سێجا ئاو بەهۆی هەڵمبوون و سیستەمی کۆنەوە بەفێڕۆ دەچێت.

ئەوەشى خستوەتەڕوو، رۆژانی خۆڵبارین لە 160 رۆژەوە بۆ 250 رۆژ لە ساڵێکدا زیادیکردووە، عیراق 90%ـی سەرچاوەکانی ئاوەکەی پشت بە ئاوە سنووربەزێنەکان دەبەستێت.

ئەوەشى ئاشکرا کردووە، عیراق ماوەی 20 ساڵە رووبەڕووی گۆڕانکاریی توندی ژینگەیی بووەتەوە، کە بەشێکی پەیوەندیی بە گۆڕانی کەشوهەوای جیهانیی و بەشێکی دیکەشی بە سیاسەتی ئاویی وڵاتانی دراوسێ و کۆنیی ژێرخانی ئاودێرییەوە هەیە.

PUKMEDIA