سبەینێ شەپۆلێکی بەفر و باران هەرێمی کوردستان دەگرێتەوە

میدیاکان

باران بارین لە سلێمانی

بەڕێوەبەرایەتی گشتی کەشناسی و بومەلەرزەزانی هەرێمی کوردستان، پێشبینی دەکات شەوی هەینی هەرێمی کوردستان بکەوێتە ژێر کاریگەری شەپۆلێکی باران و بەفر بارین و تا رۆژی دووشەممە بەردەوام دەبێت.

کەشناسی ئاماژەی بەوەشداوە، شەوی شەممە تا بەرەبەیانی یەکشەممە، بارانی بەخوڕ و بەلێزمە پارێزگاکانی دهۆک و هەولێر و ناوچەکانی بەردەڕەش، کۆیە، سۆران، ئاکرێ و ڕاپەڕین دەگرێتەوە.

هاوکات لە ماوەی ئەم شەپۆلەدا، تەواوی ناوچە شاخاوییە سنوورییەکان سپی دەپۆشن و لە ئیدارەی سۆرانیش تێکەڵەی بەفر و باران دەبارێت.

کەشناسی ئاماژەی بەوە کردووە، کە پلەکانی گەرما بە بڕی 3 بۆ 5 پلە نزم دەبنەوە. هاوکات هۆشداری دەدات لە چالاکبوونی خێرایی با لە پارێزگای هەولێرا، بەتایبەت ڕۆژی شەممە خێرایی با دەگاتە سەرووی 35 کم/س.

کەشناسی هەرێم، پێشبینی دەکات، رۆژی دووشەممە کاریگەریی شەپۆلەکە لەسەر ناوچەکانی ناوەڕاست و باکور لاواز دەبێت، بەڵام لە ناوچە شاخاوییەکان و ڕۆژهەڵاتی هەرێم بە نمەباران بەردەوامی دەبێت و لە ماوەی ئەم شەپۆلە بەفر لە سەرجەم ناوچە شاخاوییە سنورییەکان دەبارێت.

PUKMEDIA