لێکۆڵینەوە لەگەڵ ئەو داعشانە دەستپێدەکات کە لەسوریاوە گوازراونەتەوە بۆ عیراق

راگەیاندنی ئەنجوومەنی باڵای دادوەری

ئەنجوومەنی باڵای دادوەری

دادگای لێکۆڵینەوەی کەرخی یەکەم رایدەگەیەنێت: دەستی بە پڕۆسەی لێکۆڵینەوە کردووە لەگەڵ هەزار و 387 زیندانی کە سەر بە گروپی تێرۆریستی داعشن و لەزیندانەکانی سوریاوە گوازراونەتەوە بۆ عیراق.

لەبەیاننامەیەکدا ئەنجوومەنی باڵای دادوەری عیراق بڵاویکردووەتەوە: لێکۆڵینەوەکان لەلایەن ژمارەیەک دادوەری پسپۆڕ لە بواری دژە تێرۆر ئەنجام دەدرێن و مامەڵەکردن لەگەڵ دەستگیرکراوان لە چوارچێوەی یاسایی و مرۆییدا دەبێت، بە شێوەیەک کە لەگەڵ یاسا نیشتمانییەکان و ستانداردە نێودەوڵەتییەکان یەکگرتوو بن.

هەر لە بەیاننامەکەدا ئاماژە بەوەشدراوە، ئەم هەنگاوانە لە چوارچێوەی هەوڵەکانی عیراقدایە بۆ تەواوکردنی لێکۆڵینەوەکان و لێپرسینەوە لە تێوەگلاوان بە تاوانەکانی گروپی تێرۆریستی داعش بەپێی یاسا بەرکارەکان، هاوکات هەماهەنگییەکی نێودەوڵەتی هەیە بۆ چارەسەرکردنی دۆسیەی ئەو ئەندامانەی داعش، بەتایبەت ئەو تاوانانەی کە دەگاتە جینۆساید و تاوانی دژ بە مرۆڤایەتی.

لەکۆتایدا ئەنجوومەنی باڵای دادوەری عیراق رایگەیاندووە، چاوەڕواندەکرێت ژمارەی ئەو کەسانەی کە سەر بە گروپی تێرۆریستی داعشن لە سوریاوە دەگوازرێنەوە بۆ عیراق، بگاتە سەرو 7  هەزار زیندانی.

PUKMEDIA