مەزڵوم عەبدی: هێزەکانی دیمەشق هیچ ئەرکێکیان لەناو شارەکان نابێت

PUKMEDIA

مەزڵوم عەبدی فەرماندەی گشتی هێزەکانی سوریای دیموکرات

مەزڵوم عەبدی فەرماندەی گشتی هێزەکانی سوریای دیموکرات رایدەگەیەنێت: هێزەکانی ئاسایش پارێزگاری لە سەقامگیری ناوچەکە دەکەن و هێزەکانی سوریاش لەناو شارەکان هیچ ئەرکیان نابێت، روونیشی دەکاتەوە هەوڵدەدەین رێککەوتنەکە عەفرین و گرێسپی و سەرێكانیش بگرێتەوە.

  هێزەکانی سوریا ناچنە ناو هیچ شارێکەوە

 مەزڵوم عەبدی لە چاوپێکەوتنێکیدا رایگەیاند: هێزە سەربازییەکانی دیمەشق ناچنە ناو هیچ شار یان گوندێکی کوردییەوە،بەڵکو هێزێکی ئەمنی دەچێتە ناو چوارگۆشە ئەمنییەکانی حەسەکە و قامیشلۆ بۆ کاراکردنەوەی دامەزراوەمەدەنییەکان، پاشان لە شارەکە دەچنە دەرەوە و هێزەکانی ئاسایشی خۆمان پارێزگاری لە ئاسایش و سەقامگیریی ناوچەکە دەکەن.

ئاماژەی بەوەشکرد: ژمارەیەکی سنووردار لە پۆلیسی (ئاسایشی ناوخۆی سەر بە دیمەشق) دەچنە حەسەکە و قامیشلۆ، ئەرکی ئەوان تەنها هەماهەنگی و تێکەڵکردنە و دواتر دەکشێنەوە، ئەو هێزانەی دیمەشق کە دێنە ناوچەکە، دەچنە ناو ئەو شوێنانەی کە پێشوەختە دیاریکراون و هیچ ئەرکێکیان لەناو شارەکاندا نابێت، با گەلەکەمان دڵنیا بن.

پاراستنی تایبەتمەندی ناوچە کوردییەکان گرنگترین خاڵە

 لە بارەی رێککەوتنەکەشەوە، فەرماندەی گشتی هێزەکانی سوریای دیموکرات رایگەیاند: لە رۆژی 27ی1ی2026دا، کۆبوونەوە لەگەڵ (شەرع) کرا و ڕێککەوتنێک ئیمزا کرا، گرنگترین خاڵیش، کە لەسەری ڕێککەوتین ڕاگرتنی شەڕ بوو، لەگەڵ پاراستنی تایبەتمەندیی ناوچە کوردییەکانە.
پەیوەست بەناوچەکانی دیکەی رۆژئاڤا کە ئێستا لەلایەن چەکدارانەوە کۆنترۆڵ کراوە، مەزڵوم عەبدی ئاشکرای کرد: ئەوەی لەسەر ناوچە کوردییەکان ڕێککەوتنی لەسەر کراوە، لە عەفرین و سەرێکانیش جێبەجێ دەکرێت.

دامەزراوەکان وەک خۆیان دەمێننەوە

ئاماژەی بەوەشکرد:فەرمانبەرانی خۆبەڕێوەبەری لە ناوچە کوردییەکان لە سەر کارەکانیان دەمێننەوە و لەگەڵ وەزارەتە پەیوەندیدارەکاندا تێکەڵ دەکرێن،بۆیە ئەو دامەزراوانەی گەلەکەمان لە کاتی شۆڕشدا بونیادی ناون، وەک خۆیان دەمێننەوە و ناگۆڕدرێن، جێبەجێکردنی ڕێککەوتنەکە لە 2ی شوباتەوە دەستپێدەکات و گەمارۆی سەر کۆبانێ هەڵدەگیرێت.

لەرێککەوتنەکە مەترسن

لە بارەی نیگەرانییەکانیش لە رێککەوتنەکە، کە لە ئاست چاوەڕوانیدا نەبووە، مەزڵوم عەبدی دووپاتی کردەوە: دەزانم، گەلەکەمان تاڕادەیەک ناڕازییە و ڕێککەوتنەکە لە ئاستی خواست و چاوەڕوانییەکانیاندا نییە، جەختیش دەکەمەوە، کە ئەم هەستە ئێمەش دەگرێتەوە. لەگەڵ ئەوەشدا، بەردەوام دەبین لە پێناو بەدیهێنانی ئامانجی زیاتر بۆ گەلەکەمان،بۆیە پێویستە گەلەکەمان تەواو دڵنیابن و لەم ڕێککەوتنانە نەترسن، چونکە تەنها هێزەکانی ئاسایش بۆ پاراستنی هەموو شارە کوردییەکان دەمێننەوە.
بۆ وەرگرتنی پۆستیش لەلایەن خۆیەوە، ئاشکرای کرد:هیچ پۆستێکی حکوومی وەرناگرم، لەناو گەلەکەمدا و لە تەنیشتیان دەمێنمەوە و کار بۆ پێکهێنانی مەرجەعێکی سیاسیی بۆ کورد لە سوریا دەکەم.

هەسەدە وەک لیوا دەمێنێتەوە

پەیوەست بە داهاتووی هێزەکانی سوریای دیموکرات، مەزڵوم عەبدی رایگەیاند: هێزەکانی هەسەدە بە شێوەی (لیوا) لە جەزیرە و کۆبانێ دەمێننەوە، دەبێت ئەوەش بڵێم پیلانی گەورە هەبوو بۆ قڕکردنی گەلانی باکوور و ڕۆژهەڵاتی سوریا، بەڵام بەهۆی خۆڕاگری هێزەکانمان و یەکگرتوویی گەل لەگەڵیاندا، ئەو پیلانانە پووچەڵکرانەوە.

 لە کۆتایشدا، مەزڵوم عەبدی فەرماندەی گشتی هێزەکانی سوریای دیموکرات ئاماژەی بەوەشکرد: سەرۆکی فەڕەنسا پێی وتم، کە بە شێوەیەکی سیاسی گەرەنتی ڕێککەوتنەکە دەکات،ئێمەش وەک خۆمان شانازی بە هەڵوێستی گەلی کوردەوە دەکەین.

PUKMEDIA