ئیلهام ئەحمەد: پابەندین بە سەرخستنی پڕۆسەی تێکەڵکردنی هێزەکان لەگەڵ حکومەتی سوریا

Washington Kurdish Institute

ئیلهام ئەحمەد

ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەر راگەیەنراوێکى بڵاوکردەوە و رایگەیاند: دووپاتی پابەندبوونی خۆمان دەکەینەوە بە سەرخستنی رێڕەوی تێکەڵکردنەکە بە جۆرێک کە خزمەت بە یەکپارچەیی سوریا بکات و ئاشتیی کۆمەڵایەتی بەهێز بکات و بنەما بۆ قۆناغێکی نوێ لە سەقامگیری و گەشەپێدان دابڕێژێت.

دەقی راگەیێندراوەکەی ئیلهام ئەحمەد:

سوپاسی قووڵی خۆمان ئاراستەی ئەو دەوڵەت و لایەنە ناوەندگیرانە دەکەین، لە سەروویانەوە ویلایەتە یەکگرتووەکانی ئەمریکا و فەرەنسا، کە هەوڵی بێوچانیان دا بۆ گەیشتن بە رێککەوتن لە نێوان حکومەتی سوریا و هێزەکانی سوریای دیموکرات، کە هەنگاوێکی گرنگە لەسەر رێگای سەقامگیری.

هیوادارین ئەو لایەنانە رۆڵی زامنکار بگێڕن، بۆ بەدیهێنانی پرۆسەی تێکەڵکردنەکە، هاتنی هێزە ئەمنییەکان بۆ دەستەبەرکردنی پرۆسەیەکی تێکەڵکردنی بەرپرسیارانە و قۆناغ بە قۆناغە، کە هاوبەشی زامن دەکات و کەرامەتی هەموو پێکهاتەکان دەپارێزێت، و رێ خۆش دەکات بۆ گەشەپێدانێکی دادپەروەرانە و هاوسەنگ لە ناوچە جیاجیاکاندا.

دووپاتی پابەندبوونی خۆمان دەکەینەوە بە سەرخستنی رێڕەوی تێکەڵکردنەکە بە جۆرێک کە خزمەت بە یەکپارچەیی سوریا بکات و ئاشتیی کۆمەڵایەتی بەهێز بکات، و بنەما بۆ قۆناغێکی نوێ لە سەقامگیری و گەشەپێدان دابڕێژێت، هەروەها گەڕانەوەیەکی سەلامەت و بەکەرامەت بۆ خەڵکی عەفرین و سەرێکانی بۆ ناوچەکانی خۆیان دەستەبەر بکات.

PUKMEDIA