نەوت لەسەنتەری شارەکان بە 31 هەزار دینار دابەشدەکرێت

راگەیاندنی نەوت و کانزاکانی سلێمانی

پرۆسەی دابەشکردنی نەوت

وتەبێژی نەوت و کانزاکانی سلێمانی رایدەگەیەنێت: لەئێستادا نەوتی پێویستمان بۆ دابەشکردن بەسەر سەنتەری شارەکاندا لەبەردەستدا نییە و چاوەڕێی گەیشتنی بڕی پێویستین، وتیشی: ناردنی نەوت لەلایەن حکومەتی عیراقەوە بەردەوامە بەڵام رۆژانە بڕێکی کەم دەنێردرێت.

سەلام عومەر وتەبێژی نەوت و کانزاکانی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لەئێستادا نەوتی پێویستمان بۆ دابەشکردن بەسەر سەنتەری شارەکاندا لەبەردەستدا نییە و چاوەڕێی گەیشتنی بڕی پێویستین، هەرچەندە ناردنی نەوت لەلایەن حکومەتی عیراقەوە بەردەوامە بەڵام رۆژانە بڕێکی کەم دەنێردرێت و هەرکاتێک بڕەکە گەیشتە ئەو ئاستەی بتوانین دابەشی بکەین و هەموو هاووڵاتیان لێی سوودمەند بن دەست بەدابەشکردنی دەکەین.

راشیگەیاند: حکومەتی عیراق تا ئێستا نزیکەی 800 هەزار لیتر نەوتی بۆ ناردووین هەرکارتێک بڕەکە گەیشتە ملیۆنێک لیتر دەست بەدابەشکردنی دەکەین و هەر خێزانێک 100 لیتر نەوتی لەبەرامبەر 31 هەزار دیناردا پێ دەدرێت.

سەلام عومەر وتەبێژی نەوت و کانزاکانی سلێمانی ئاماژەی بەوەشکرد، لە ساڵی رابردوودا زیاتر لە 61 ملیۆن لیتر نەوت بەسەر هاووڵاتیانی ناوچە شاخاوییەکانی دەرەوەی شار و پارێزگای هەڵەبجەدا دابەشکراوە، بەڵام نەوتی پێویستمان بۆ دابەشکردن بەسەر سەنتەری شارەکاندا لەبەردەستدا نییە و چاوەڕێی گەیشتنی بڕی پێویستین.


ئەمەش لەکاتێکدایە، هەر بەرمیلێک نەوت کە دەکاتە(200) لیتر، بە نرخی 104 هەزار دەدرێت بە هاووڵاتیان و لەمساڵدا پرۆسەی دابەشکردن لە ناوچەکانی دەرەوەی سەنتەری پارێزگای سلێمانی و هەڵەبجە بەردەوام بووە و بەهۆیەوە 305 هەزار و 405 خێزان لەو ناوچانە سوودمەند بوون و 61 ملیۆن لیتر نەوت دابەشکراوە.

PUKMEDIA