سه‌ندیكای رۆژنامه‌نووسان ئاماری پێشێلكارییه‌كان راده‌گه‌یه‌نێت

سەندیکاى رۆژنامەنووسان

وێنەیەکى کۆنگرەکە

بۆردی داكۆكی له ‌ئازادی ‌و مافی رۆژنامه‌نووسان راپۆرتی 34ـه‌مینی خۆی بۆ ساڵى 2025 بڵاوكرده‌وه، کە 46 پێشێلکارى تۆمارکراوە، هاوکات لە راپۆرتەکەدا چالاکی لق و نوسینگەکان بڵاوکراوەتەوە، کەتێیدا لقی سلێمانی لە 2025دا چاودێری زیاتر لە 100 کەیسی رۆژنامەنوسانی کردووە، لەبەرامبەردا لقەکانی تر تەنها چاودێری چەند کەیسێکیان کردووە.
‌
ئەمڕۆ دووشەممە 19ى1ى2026 له ‌باره‌گای ئه‌نجومه‌نی سه‌ندیكای رۆژنامه‌نووسانی كوردستان، بۆردی داكۆكی له‌ ئازادی و مافی رۆژنامه‌نووسان، راپۆرتی ژماره‌ 34 تۆماری پێشێلكاری و مافی رۆژنامه‌نووسانی بۆ ساڵی 2025 بڵاوكرده‌وه‌.

ئازاد حه‌مه‌ده‌مین نه‌قیبی رۆژنامه‌نووسان، هه‌ندرێن ئه‌حمه‌د سه‌رۆكی بۆردی داكۆكی‌، كاروان ئه‌نوه‌ر، سمكۆ عه‌بدولكه‌ریم،  گۆران جه‌لال ئه‌ندامانی بۆرد‌ و حوسامه‌دین سه‌رداری راویژكاری یاسایی ئه‌نجومه‌ن، له ‌باره‌گای ئه‌نجومه‌ندا، كۆنگره‌ی رۆژنامه‌وانی بۆ راگه‌یاندنی راپۆرتی ژماره‌ 34ی تۆماری پێشێلكاری‌و مافی رۆژنامه‌نووسانی بۆ ساڵی 2025 ، ساز كرد ‌و تێیدا ئاماژه‌ به‌ ناوه‌ڕۆكی راپۆرته‌كه‌ كرا.

راپۆرتی ژماره‌ 34ی  بۆردی داكۆكی، پێشێلكارییه‌كانی له ‌هه‌رێمی كوردستان ‌و ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم ‌و پێشێلكارییه‌كانی حكومه‌تی ئیتحادی، سوپا‌ و حه‌شدی شه‌عبی ، له‌ دژی رۆژنامه‌نووسان به‌ وردی له ‌خۆده‌گرێت، كه‌ كۆییه‌كی بریتییه‌ له‌ 23 حاڵه‌تی پێشێلكاری له‌ دژی 45 رۆژنامه‌نووس‌ و 1 ده‌زگه‌ی میدیایی، كه ‌مه‌ترسیدارترین جۆری بریتی بوو له‌، ته‌قه‌كردن له ‌میدیاكارێك له ‌سلێمانی، هه‌روه‌ها زۆرترین جۆری پێشێلكاری بریتی بوو له،‌ رێگری كردن له‌ رووماڵی رووداوه‌كان.

له ‌كۆنگره‌ رۆژنامه‌وانییه‌كه‌دا، ئاماژه‌ به‌وه‌ كرا: ئه‌نجومه‌نی سه‌ندیكا ناوی  لیژنه‌ی داكۆكی گۆڕیوه‌ بۆ بۆردی داكۆكی و رۆژنامه‌نووسان مافی خۆیانه‌ كه‌ حكومه‌ت وه‌ك هه‌ر فه‌رمانبه‌رێك‌ و پیشه‌یه‌كی دیكه‌، پارچه‌ زه‌وی نیشته‌جێبوونیان پێ بدات، له‌هه‌مانكاتدا راپۆرتی پێشێلكاریەکان راسپارده‌ی بۆ ساڵی 2026 تۆماركردوه‌، كه‌ له‌كاتی كارابوونه‌وه‌ی په‌رله‌مانی كوردستان، چه‌ند یاسایه‌ك پێویسته‌ هه‌موار بكرێته‌وه ‌و هه‌ندێك بڕیارێكیش ده‌ربچێت، كه‌ خزمه‌تی پیشه‌ی رۆژنامه‌نووسی و ئازادی میدیا له ‌كوردستان ده‌كات.

لە راپۆرتەکەدا چالاکی لق و نوسینگەکان بڵاوکراوەتەوە کە تێیدا لقی سلێمانی سەندیکای رۆژنامەنوسان لە ساڵی 2025دا چاودێری زیاتر لە 100 کەیسی رۆژنامەنوسانی کردووە لە دادگای سلێمانی و لە بەرامبەردا لە لق و نوسینگەکانی تر تەنها چەند کەیسێک چاودێری کراون.

لينكی راپۆرتەکە لێرەوە بخوێنەرەوە.

PUKMEDIA